رۇسىيەنىڭ جەنۇبىدىكى كراسنودار ۋە نېۋىننومىسسېك شەھەرلىرىدە ئېلېكترونلۇق سودا سۇپىسى ۋىلدبېررېسغا تەۋە ئەشيا ئوبوروت مەركەزلىرىگە قىلىنغان ئۇچقۇچىسىز ھاۋا ئاپپاراتى ھۇجۇملىرىدا 10 كىشىنىڭ يارىلانغانلىقى بىلدۈرۈلدى.
ۋىلدبېررېسنىڭ قۇرغۇچىسى ۋە باش ئىجرائىيە ئەمەلدارى تاتيانا كىم، ئاممىۋى ئورتاقلىشىش تور بېتى Telegram سەھىپىسىدە ئېلان قىلغان باياناتىدا، يېرىم كېچىدە كراسنودار ۋە نېۋىننومىسسېك شەھەرلىرىدىكى ئىككى ئەشيا ئوبوروت مەركىزىنىڭ ھۇجۇمغا ئۇچرىغانلىقىنى ئۇقتۇردى.
خىزمەتچىلەرنىڭ تېزلىكتە تارقاقلاشتۇرۇلغانلىقىنى بايان قىلغان كىم، دەسلەپكى مەلۇماتلارغا ئاساسەن يارىلانغانلارنىڭ بارلىقىنى ۋە زۆرۈر ياردەملەرنىڭ بېرىلىدىغانلىقىنى ئەسكەرتتى.
كراسنودار رايونىنىڭ ۋالىيسى ۋېنيامىن كوندىراتيېۋمۇ رايوننىڭ يېرىم كېچىدە كەڭ كۆلەملىك ئۇچقۇچىسىز ھاۋا ئاپپاراتى ھۇجۇمىغا ئۇچرىغانلىقىنى، كراسنوداردىكى ۋىلدبېررېس ئەشيا ئوبوروت مەركىزىگە قىلىنغان ھۇجۇمدا 10 كىشىنىڭ يارىلانغانلىقىنى جاكارلىدى.
كوندىراتيېۋ يارىلانغانلاردىن 3 كىشىنىڭ ئەھۋالىنىڭ ئېغىر ئىكەنلىكىنى ۋە دوختۇرخانىغا ئورۇنلاشتۇرۇلغانلىقىنى يەتكۈزدى.
ئەشيا ئوبوروت مەركىزىدە ھۇجۇم كەلتۈرۈپ چىقارغان زىيانلارنى تۈگىتىش ۋە ئوتنى ئۆچۈرۈش خىزمەتلىرىنىڭ داۋاملىشىۋاتقانلىقىنى ئەسكەرتكەن كوندىراتيېۋ، ئارماۋىر شەھىرىدە ئۇچقۇچىسىز ھاۋا ئاپپاراتى پارچىلىرىنىڭ بىر كارخانا مەيدانىغا چۈشۈپ كېتىشى نەتىجىسىدە بىر خىزمەتچىنىڭ ھاياتىدىن ئايرىلغانلىقى توغرىسىدىكى ئۇچۇرنى ھەمبەھىرلىدى.
كوندىراتيېۋ يەنە ئۇچقۇچىسىز ھاۋا ئاپپاراتى پارچىلىرىنىڭ كراسنوداردا ئىككى ئولتۇراق بىناغا، دىنسكايا ئولتۇراق رايونىدا بولسا ئىككى ئۆيگە تەگكەنلىكىنى بىلدۈردى.
ۋىلدبېررېس رۇسىيەنىڭ ئەڭ چوڭ ئېلېكترونلۇق سودا سۇپىلىرىنىڭ بىرى ھېسابلىنىدۇ. يېقىنقى كۈنلەردە شىركەتكە تەۋە ئوخشىمىغان ئەشيا ئوبوروت مەركەزلىرىگە ئۇچقۇچىسىز ھاۋا ئاپپاراتى ھۇجۇملىرى ئېلىپ بېرىلغان ئىدى.
