شىمالىي قىبرىس تۈرك جۇمھۇرىيىتى (ش ق ت ج) جۇمھۇرىيەت مەجلىسى رەئىسى زىيا ئۆزتۈركلەر، قىبرىس تۈرك خەلقىنى جازالاشقا قارىتىلغان خەلقئارالىق ئادالەتسىز تۈزۈمنىڭ ئاخىرلىشىشى كېرەكلىكىنى بىلدۈرۈپ: «بىر خەلقنى دۇنيادىن ئايرىپ تاشلاپ تۇرۇپ تىنچلىق قۇرغىلى بولمايدۇ» دېدى.
قىبرىس تىنچلىق ھەرىكىتىنىڭ 52 يىللىقى ۋە 20-ئىيۇل تىنچلىق ۋە ئەركىنلىك بايرىمى مۇناسىۋىتى بىلەن جۇمھۇرىيەت مەجلىسىدە كۈتۈۋېلىش زىياپىتى ئۆتكۈزۈلدى.
زىياپەتكە ش ق ت ج ۋە تۈركىيەدىن كەلگەن مەسئۇللار بىلەن پۇقرالار قاتناشتى.
زىياپەتتە سۆز قىلغان ئۆزتۈركلەر قىبرىس تۈرك خەلقىنىڭ ئىگىلىك ھوقۇقى، تۈركىيەنىڭ ئاكتىپ ۋە ئەمەلىي كاپالەتچىلىك ھوقۇقى، شۇنداقلا ش ق ت ج نىڭ ھازىرقى سالاھىيىتىنىڭ سۆھبەت تېمىسى بولالمايدىغانلىقىنى ئېيتتى.
قىبرىس تۈرك خەلقىنىڭ ئۆتمۈشتە ئازاب، زۇلۇم ۋە كۆچۈشنى باشتىن كەچۈرگەنلىكىنى، لېكىن كەلگۈسىگە ھەر ۋاقىت ئۈمىد بىلەن قارىغانلىقىنى ئىپادىلىگەن ئۆزتۈركلەر، ئەڭ قىيىن مەزگىللەردە ئانا ۋەتىنى تۈركىيەنى ھەر ۋاقىت يېنىدا كۆرگەنلىكلىرىنى ئەسكەرتتى.
خەلقئارا جەمئىيەتنىڭ ئەمدى رېئاللىق بىلەن يۈزلىنىشى كېرەكلىكىنى تەكىتلىگەن زىيا ئۆزتۈركلەر: «بىر خەلقنى دۇنيادىن ئايرىپ تاشلاپ تۇرۇپ تىنچلىق ئورناتقىلى بولمايدۇ. قىبرىس تۈرك خەلقىنى جازالاشقا قارىتىلغان ئادالەتسىز خەلقئارا تۈزۈم ئەمدى ئاخىرلىشىشى كېرەك. ھېچكىم قىبرىس تۈرك خەلقىنى مەڭگۈ مۇشۇنداق ھالەتتە قېلىپ قالىدۇ دەپ ئويلىماسلىقى كېرەك. چۈنكى، ھەققانىي كۈرىشىمىز كۈندىن-كۈنگە تېخىمۇ كۆپ قوللاشقا ئېرىشمەكتە» دېگەنلەرنى قەيت قىلدى.
