دۇنيادىكى ئەڭ چوڭ ئاۋىياتسىيە، ئالەم بوشلۇقى ۋە تېخنولوگىيە بايرىمى بولغان تېكنوفېست (TEKNOFEST) نىڭ بىرىنچى كۈنىدە كۆز يۈزىدە ماھارەت كۆرسىتىش ئۇچۇشلىرى ئېلىپ بېرىلدى.
ماھارەت كۆرسىتىش پائالىيەتلىرى تۈركىيەنىڭ يەرلىك ۋە مىللىي ئومۇمىي مەقسەتلىك تىك ئۇچار ئايروپىلانى T-70 تىن پاراشۇت بىلەن سەكرەش بىلەن باشلاندى.
كەسپىي ئەسكەرلەر تەرىپىدىن ئېلىپ بېرىلغان بۇ پائالىيەتتە، يۇقىرى بوشلۇققا چىققان T-70 تىك ئۇچار ئايروپىلانىدىن پاراشۇتچىلار سەكرىدى. بوشلۇقتا تۈركىيە بايرىقى ۋە ئاتاتۈرك پورترېتىنى ئاچقان پاراشۇتچىلار بايرام مەيدانىدىكى زىيارەتچىلەرنىڭ قىزغىن ئالقىشىغا ئېرىشتى.
ماھارەت كۆرسىتىشلىرىنىڭ داۋامىدا، بايقار شىركىتى تەرىپىدىن تەتقىق قىلىپ ياساپ چىقىلغان «ئاقىنجى» قوراللىق ئۇچقۇچىسىز ھاۋا ئاپپاراتى بوشلۇقتىن ئورۇن ئالدى. ئىلغار تېخنولوگىيەسى ۋە ئۆزىگە سەپلەنگەن ئوق-دورىلىرى بىلەن دىققەت تارتىدىغان «ئاقىنجى» نىڭ ماھارەت كۆرسىتىش ئۇچۇشى زىيارەتچىلەرگە كۆرۈنۈش زىياپىتى سۇندى.
ھاۋادا تۇرۇش ۋاقتى 24 سائەتتىن ئاشىدىغان، سۈنئىي ئەقىل قوللىنىلغان «ئاقىنجى» نىڭ بايرام مەيدانىدىن تارتقان ئارقىمۇئارقا سۈرەتلىرى مەيداندىكى چوڭ ئېكرانلار ئارقىلىق زىيارەتچىلەرگە كۆرسىتىلدى.
ماھارەت كۆرسىتىشنىڭ يەنە بىر بۆلىكىدە پاراشۇت ۋە يەلكەنلىك قانات ئۇچقۇچىلىرى ئۇچۇش ئېلىپ باردى. بوشلۇقتا لەيلەپ يۈرگەن رەڭدار قاناتلار بايرام مەيدانىدىكى زىيارەتچىلەرگە كۆڭۈللۈك دەقىقىلەرنى بېغىشلىدى.
مەزكۇر بايرام 4-ئۆكتەبىرگىچە تۈرلۈك پائالىيەتلەر بىلەن داۋاملىشىدۇ.
