رۇسىيە تاشقى ئىشلار مىنىستىرلىقىنىڭ باياناتىغا ئاساسلانغاندا، لاۋروۋ بىلەن رۇبىيو فىلىپپىننىڭ پايتەختى مانىلادا ئۆتكۈزۈلگەن شەرقىي جەنۇبىي ئاسىيا ئەللىرى ئىتتىپاقى («ئاسىئان» / ASEAN) يىغىنلىرى دائىرىسىدە بىر يەرگە جەم بولغان.
ئۇكرائىنا كىرىزىسى مۇزاكىرە قىلىنغان ئۇچرىشىشتا، لاۋروۋ ئامېرىكالىق مەنسەپدىشىگە توقۇنۇش لىنىيەسىدىكى ھەقىقىي ۋەزىيەت توغرىسىدا مەلۇمات بېرىپ: «كىيېۋ ھۆكۈمىتىگە قورال-ياراغ ياردىمى بېرىش ئارقىلىق رۇسىيەنى ئىستراتېگىيەلىك مەغلۇبىيەتكە ئۇچرىتىشقا ئۇرۇنۇۋاتقان ياۋروپا دۆلەتلىرىنىڭ ۋەزىيەتنى تۇراقسىزلاشتۇرغۇچى سىياسەتلىرىنى قوبۇل قىلىش مۇمكىن ئەمەس» دېگەن.
لاۋروۋ يەنە، رۇسىيە تەرەپنىڭ مەسىلىنى سىياسىي ۋە دىپلوماتىك يوللار بىلەن ھەل قىلىشقا ئوچۇق ئىكەنلىكىنى، شۇنداقلا ئامېرىكا بىلەن ئالياسكا باشلىقلار يىغىنىدا ھاسىل قىلىنغان كېلىشىملەرگە ئەمەل قىلىدىغانلىقىنى جەزملەشتۈردى.
رايون خاراكتېرلىك ۋە خەلقئارالىق مەسىلەرمۇ مۇھاكىمە قىلىنغان ئۇچرىشىشتا، ئىككى مىنىستىر پارس قولتۇقىدىكى ۋەزىيەت توغرىسىدىمۇ پىكىر ئالماشتۇردى.
ئىككى تەرەپلىك مۇناسىۋەتلەرنى ياخشىلاش مۇساپىسى مۇزاكىرە قىلىنغان ئۇچرىشىشتا، رۇسىيە ۋە ئامېرىكا دىپلوماتىك ئورگانلار ۋاكالەتخانىلىرىنىڭ خىزمەت شارائىتىنى ياخشىلاشقا ئالاقىدار مەسىلىلەرمۇ كۈنتەرتىپكە كەلدى.
لاۋروۋ بىلەن رۇبىيو رۇسىيە فېدېراتسىيەسى ئالەم بوشلۇقى ئىدارىسى («روسكوسموس» / Roscosmos) بىلەن ئامېرىكا ئالەم قاتنىشى ۋە ئالەم بوشلۇقى ئىدارىسى («ناسا» / NASA) ئوتتۇرىسىدىكى ئالاقىنىڭ قايتىدىن باشلىنىشىنى قارشى ئالىدىغانلىقىنى بىلدۈرۈپ، ئىككى دۆلەت پارلامېنتلىرى ئوتتۇرىسىدىكى ئالاقە ۋە مەدەنىيەت ساھەسىدىكى رىشتىلەرنىڭ تەرەققىي قىلدۇرۇلۇشىنى قوللايدىغانلىقىنى ئىپادىلىدى.
ئۇچرىشىشتا، تاشقى ئىشلار مىنىستىرلىقلىرى ئوتتۇرىسىدىكى ئالاقىنى ئىزچىل داۋاملاشتۇرۇش توغرىسىدا ئورتاق تونۇش ھاسىل قىلىندى.
