ترامپ ھۆكۈمىتى كانادانىڭ ئامېرىكا ئاپتوموبىللىرى، ئىسپىرتلىق ئىچىملىكلىرى ۋە سۈت مەھسۇلاتلىرىغا قارىتا قانۇنسىز كەمسىتىش ئېلىپ بېرىۋاتقانلىقىنى ئىلگىرى سۈرۈپ، كانادادىن ئىمپورت قىلىنىدىغان مەھسۇلاتلارنىڭ كۆپ قىسمىغا % 50 تاموژنا بېجى قويۇشقا باشلىدى.
كانادا باش مىنىستىرى مارك كارنېي، ئامېرىكا قوشما ئىشتاتلىرى پىرېزىدېنتى دونالد ترامپ كانادانى نىشان قىلغان يېڭى تاموژنا بېجى پىلانىنى ئېلان قىلغاندىن كېيىن، ئوتتاۋانىڭ ۋاشىنگتون بىلەن سودا سۆھبەتلىرىنى چوڭقۇرلاشتۇرۇشقا تەييار ئىكەنلىكىنى ئېيتتى.
كارنېي ئامېرىكا ھۆكۈمىتىنىڭ كانادانىڭ نۇرغۇن مەھسۇلاتلىرىغا % 50 تاموژنا بېجى قويۇش پىلانىغا قارىتا: «بۇ، ئامېرىكا قوشما ئىشتاتلىرىنىڭ كانادا-ئامېرىكا-مېكسىكا كېلىشىمىنى (CUSMA) ئوچۇق-ئاشكارا ھالدا دەپسەندە قىلىپ يولغا قويغان بىر تەرەپلىمە سودا قەدەملىرىنىڭ ئەڭ ئاخىرقى ھالقىسى» دېدى.
ئۇ، كانادانىڭ ۋاشىنگتوننىڭ سودا مۇناسىۋەتلىرىنى قايتىدىن شەكىللەندۈرۈش مۇساپىسىدە تالاش-تارتىشلارنى ھەل قىلىش ئۈچۈن تۈرلۈك تەكلىپلەرنى سۇنغانلىقىنى بىلدۈرۈپ: «بۇ سۆھبەتلەرنى تېخىمۇ قويۇقلاشتۇرۇشقا تەييارمىز» دېدى.
ترامپ ھۆكۈمىتى بۇنىڭدىن ئىلگىرى، كانادانىڭ ئامېرىكا ئاپتوموبىللىرى، ئىسپىرتلىق ئىچىملىكلىرى ۋە سۈت مەھسۇلاتلىرىغا قارىتا قانۇنسىز كەمسىتىش ئېلىپ بېرىۋاتقانلىقىنى ئىلگىرى سۈرۈپ، كانادادىن ئىمپورت قىلىنىدىغان مەھسۇلاتلارنىڭ كۆپ قىسمىغا % 50 تاموژنا بېجى قويۇشقا باشلىغان ئىدى.
338-ماددا
بۇ قەدەمنىڭ تەپسىلاتى ھەققىدە مەلۇمات بەرگەن كانادالىق بىر ئەمەلدار، كانادانىڭ خىتايدىن باشقا ترامپ ئىلگىرى يولغا قويغان تاموژنا بېجى سىياسەتلىرىگە قايتۇرما زەربە بەرگەن ئاز ساندىكى دۆلەتلەرنىڭ بىرى ئىكەنلىكىنى، شۇڭا بۇنىڭ ھېسابىنى بېرىشى كېرەكلىكىنى ئېيتتى.
ئۇ، ترامپنىڭ مەزكۇر تاموژنا بېجى سىياسەتلىرىنى يولغا قويۇش ئۈچۈن 1930-يىللىق «سودا قانۇنى» نىڭ 338-مادىسىغا ئاساسەن ئۈچ دانە پىرېزىدېنت پەرمانىغا ئىمزا قويغانلىقىنى بىلدۈردى. ئۆتكەن يىلى ئامېرىكا قوشما ئىشتاتلىرى دۆلەت مەجلىسىدىكى بەزى دېموكرات ئەزالار، ترامپنىڭ بۇ ماددىنى ئىقتىسادنىڭ مۇقىملىقىغا زىيان يەتكۈزۈش مەقسىتىدە ئىشلىتىشى مۇمكىنلىكىنى ئىلگىرى سۈرۈپ، مەزكۇر بەلگىلىمىنىڭ ئەمەلدىن قالدۇرۇلۇشىنى تەكلىپ قىلغان ئىدى.
% 50 لىك تاموژنا بېجى ئېنېرگىيە مەھسۇلاتلىرى، پوتاس، بېلىق ۋە ھالقىلىق مىنېراللارنى ئۆز ئىچىگە ئالمايدۇ. ئەمما، بۇنىڭدىن ئىلگىرى ئامېرىكا-مېكسىكا-كانادا كېلىشىمى (USMCA) دائىرىسىدە تاموژنا بېجىدىن مۇستەسنا قىلىنغان مەھسۇلاتلار بۇ يېڭى بوجلارغا داخىل قىلىنىدۇ.
2020-يىلى يولغا قويۇلغان مەزكۇر سودا كېلىشىمىنىڭ مۇددىتى يېقىندا توشتى. تەرەپلەر ئوتتۇرىسىدا 2036-يىلغىچە داۋاملىشىشى مۇمكىن بولغان يېڭى بىر سۆھبەت مۇساپىسى باشلاندى.
ئەمەلدار يەنە، ترامپنىڭ كانادادىكى ئورمان ئوت ئاپەتلىرىنىڭ ئامېرىكا قوشما ئىشتاتلىرىدىكى ھاۋا سۈپىتىگە سەلبىي تەسىر كۆرسەتكەنلىكى سەۋەبىدىن، مەسلىھەتچىلىرىدىن كاناداغا قارىتا قوشۇمچە تاموژنا بېجى قويۇش مەسىلىسىگە قاراپ چىقىشنى تەلەپ قىلغانلىقىنى ئېيتتى.
