تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان بىرلەشكەن دۆلەتلەر تەشكىلاتى (ب د ت) باش كاتىپى ئانتونىيو گۇتېررېس بىلەن كۆرۈشتى. ئۇچرىشىشتا رايون ۋە خەلقئارالىق مەسىلىلەر مۇزاكىرە قىلىندى. جۇمھۇر رەئىس ئەردوغان ۋەزىپە ئۆتەش مۇددىتى توشۇش ئالدىدا تۇرغان گۇتېررېس بىلەن يەرشارى تىنچلىقى ۋە خەۋپسىزلىكىگە ئائىت نۇرغۇن مەسىلىلەردە يېقىندىن ھەمكارلاشقانلىقىنى بىلدۈردى.
ئەردوغان ئىسرائىلىيەنىڭ غەززەدە تىنچلىق خالىمايدىغانلىقىنىڭ يەنە بىر قېتىم ئاشكارىلانغانلىقىنى، ئىيوردان دەرياسىنىڭ غەربىي قىرغىقىدىكى كۆچمەنلەر تېررورى ۋە قۇددۇستىكى مۇقەددەس جايلارغا قىلىنغان ھۇجۇملارنىڭ ۋەزىيەتنى تېخىمۇ يامانلاشتۇرغانلىقىنى تەكىتلەپ، ئىككى دۆلەتلىك ھەل قىلىش چارىسى ئاساسىنى قوغداش كېرەكلىكىنى ئوتتۇرىغا قويدى.
شۇنىڭ بىلەن بىرگە، ئەردوغان ئىران ۋە ئۇكرائىنا مەسىلىسىدە جىددىيچىلىكنى پەسەيتىش كېرەكلىكىنى، تۈركىيەنىڭ دىپلوماتىك مۇساپىگە ئەمەل قىلىنىشى ئۈچۈن تىرىشچانلىق كۆرسىتىۋاتقانلىقىنى ئېيتتى. ئۇ يەنە، ھورمۇز بوغۇزى مەسىلىسىدە رايون ئىچىدىن بارلىققا كېلىدىغان بىر جەرياننىڭ پايدىلىق بولىدىغانلىقىنى ئىپادىلىدى.
قارا دېڭىزدىكى دېڭىز قاتنىشى بىخەتەرلىكى ئۈچۈن تەرەپلەرنىڭ مەسئۇلىيەتچان پوزىتسىيە تۇتۇشىنى كۈتىدىغانلىقىنى بىلدۈرگەن ئەردوغان، تۈركىيەنىڭ قارا دېڭىزدا سودا پاراخوتلىرىنىڭ نىشانغا ئېلىنىشىدىن بىئارام ئىكەنلىكىنى ئالاھىدە تەكىتلىدى. ئۇندىن باشقا، قىبرىس ئارىلىدا قىبرىس تۈرك خەلقىنىڭ ئىگىلىك ھوقۇق باراۋەرلىكىنى ۋە خەلقئارالىق باراۋەر ئورنىنى ئېتىراپ قىلمايدىغان ھېچقانداق تەكلىپنىڭ نەتىجە بەرمەيدىغانلىقىنى سۆزلىرىگە ئىلاۋە قىلدى. بۇ جەرياندا، جۇمھۇر رەئىس ئەردوغان ب د ت باش ئىشتابىدا 81-نۆۋەتلىك ئومۇمىي كېڭەشكە ئاتاپ تەييارلانغان خاتىرە دەپتەرگە ئىمزا قويدى.
ئۇ يەنە شۇ كۈنى قاتار ئەمىرى شەيخ تەمىم بىن ھەمەد ئال سانى بىلەنمۇ كۆرۈشتى. تۈركىيە بىلەن قاتارنىڭ ئىككى تەرەپلىك مۇناسىۋەتلىرى شۇنداقلا رايون ۋە يەرشارى مەسىلىلىرى مۇزاكىرە قىلىنغان بۇ ئۇچرىشىشتا، ئەردوغان ئىككى دۆلەت مۇناسىۋىتىنى مەبلەغ سېلىش، سودا، ئېنېرگىيە ۋە مۇداپىئە سانائىتى باشتا بولۇپ بارلىق ساھەلەردە تېخىمۇ يۇقىرى سەۋىيەگە يەتكۈزۈش ئۈچۈن داۋاملىق تىرىشىدىغانلىقىنى بىلدۈردى.
رايوندىكى ئېنېرگىيە تەمىناتىغا سەلبىي تەسىر كۆرسىتىۋاتقان تەرەققىياتلارنىڭ ھەممەيلەننى قىيىن ئەھۋالغا چۈشۈرۈپ قويغانلىقىنى ئەسكەرتكەن ئەردوغان، ئېنېرگىيە ۋە تىرانسپورت كارىدورى ساھەسىدىكى ھەمكارلىقنى ئىلگىرى سۈرۈشنىڭ مۇھىملىقىنى تەكىتلىدى. ئۇ يەنە ئىسرائىلىيەنىڭ غەززەدە تىنچلىق قەدىمى تاشلىماسلىقتا چىڭ تۇرۇۋاتقانلىقىغا ئىشارەت قىلىپ، رايوندىكى ئىسرائىلىيە تاجاۋۇزچىلىقىنى تىزگىنلەش ئۈچۈن خەلقئارا جەمئىيەتنىڭ كۈچلۈك بېسىم ئىشلىتىشىنىڭ مۇھىملىقىنى ئالاھىدە كۆرسەتتى.
بۇلاردىن سىرت، ئەردوغان سېنېگال پىرېزىدېنتى باسسىرۇ دىئوماي فاي، پولشا پىرېزىدېنتى كارول ناۋروككى، ئەنگلىيە باش ۋەزىرى ئەندى بۇرنخام، ياپونىيە باش ۋەزىرى تاكائىچى ساناې ۋە بېنگال باش مىنىستىرى تارىق راھمان قاتارلىق رەھبەرلەر بىلەن ئايرىم-ئايرىم كۆرۈشتى. بۇ ئۇچرىشىشلاردا قوش تەرەپلىك مۇناسىۋەتلەردىن سىرت خەلقئارالىق مەسىلىلەرمۇ كۈنتەرتىپكە كەلدى.
