ئىران رەسمىي ئاگېنتلىقى IRNA نىڭ خەۋەر قىلىشىچە، ئاراقچى ئامېرىكا ئەمەلدارلىرى بىلەن سۆھبەت ئۆتكۈزگەنلىكىگە ئالاقىدار دەۋالار بىلەن ئامېرىكا مۇئاۋىن پىرېزىدېنتى JD ۋېنسنىڭ تىنچلىق سۆھبەتلىرىنى قايتىدىن باشلاش مەقسىتىدە ئىراننىڭ يۇقىرى دەرىجىلىك خەۋپسىزلىك ئەمەلدارى مۇھسىن رىزايىغا ئەۋەتكەنلىكى ئىلگىرى سۈرۈلگەن مەكتۇپ توغرىسىدا بايانات بەردى.
ئاراقچى ۋېنسنىڭ ئەۋەتكەن مەكتۇبىنى دىققەت بىلەن كۆزدىن كەچۈرگەنلىكىنى ۋە مەسىلىنىڭ ئالاقىدار كېڭەشلەردە مۇزاكىرە قىلىنغانلىقىنى بىلدۈردى. شۇنداقلا ئامېرىكىلىق ئەمەلدارلار بىلەن ھەر قانداق بىر سۆھبەتلىشىش پىلانىنىڭ يوقلۇقىنى ۋە بۇ يۆنىلىشتە ئوتتۇرىغا ئېتىلغان دەۋالارنىڭ ھەقىقەتنى ئەكس ئەتتۈرمەيدىغانلىقىنى ئېيتتى.
نۆۋەتتىكى ئەھۋالدا ئامېرىكا بىلەن سۆھبەتلىشىشنىڭ زۆرۈرىيىتىنى ھېس قىلمىغانلىقىنى ۋە دۆلىتىنىڭ شەرتلىرىنىڭ ئېنىق ئىكەنلىكىنى قەيت قىلغان ئاراقچى، ۋاسىتىچى دۆلەتلەر بولغان قاتار ۋە پاكىستان بىلەن سۆھبەتلەرنىڭ داۋاملىشىۋاتقانلىقىنى ئېيتىپ، ئامېرىكا ئىراننىڭ شەرتلىرىنى قوبۇل قىلغاندىن كېيىن سۆھبەتلەرنىڭ بىۋاسىتە ياكى ۋاسىتىلىك بولۇشىغا قارار قىلىنىدىغانلىقىنى تەكىتلىدى.
ئامېرىكانىڭ دىيالوگ ئىشىكىنى ئېچىش تىرىشچانلىقى ئىجابىي بىر قەدەم سۈپىتىدە باھالىنىشى مۇمكىن
ئاراقچى ۋېنسنىڭ مەكتۇبى بىلەن بىرگە ئامېرىكانىڭ دىيالوگ ئىشىكىنى ئېچىش ۋە تېخىمۇ كەڭ بىر كېلىشىمگە كېلىش يۆنىلىشىدىكى تىرىشچانلىقىنىڭ ئىجابىي بىر قەدەم سۈپىتىدە باھالىنىدىغانلىقىنى بىلدۈردى.
ئاراقچى دۆلىتىنىڭ 7 شەرتى قوبۇل قىلغا تەقدىردە ھورمۇز بوغۇزىنىڭ 7 كۈن ئىچىدە قايتىدىن ئېچىلىشىغا ئالاقىدار تەكلىپكە قارىتا: «قاتار تەرەپ تەكلىپىمىزنىڭ ئىجرا قىلىنىش ۋاقتىنىڭ 5 كۈنگە قىسقارتىلىشىنى تەلەپ قىلغان ئىدى. ھازىرقى باسقۇچتا بولسا بۇ ۋاقىتنىڭ 2 كۈنگە چۈشۈرۈلۈشى يۆنىلىشىدىكى بىر تەكلىپ ئۈستىدە توختىلىۋاتىدۇ» دېگەن سۆزلەرنى ئىشلەتتى.
ئۇرۇش ئېھتىماللىقىنىمۇ نەزەردىن ساقىت قىلمىغانلىقىنى ئەسلىتىپ ئۆتكەن ئاراقچى، بارلىق سېنارىيەلەرگە تەييار ئىكەنلىكىنى ئېيتىپ، ھورمۇز بوغۇزىنىڭ ئېچىلىش شەرتىنى ئىران ۋە ئومان تەرىپىدىن بەلگىلەنگەن يېڭى ئۆتۈش لىنىيەسىنىڭ قوبۇل قىلىنىشىغا ۋە باشقا ئالاقىدار لىنىيەلەرنىڭ تاقىلىشىغا باغلىغانلىقىنى ئۇقتۇردى.
ئاراقچى يەنە، ئامېرىكانىڭ ئىراننىڭ نېفىت سېتىشىغا قاراتقان كەچۈرۈمىنى قايتىدىن يولغا قويۇشىنى ۋە قاتاردىكىلەرنىمۇ ئۆز ئىچىگە ئالغان دۆلىتىنىڭ توڭلىتىپ قويۇلغان بارلىق مۈلۈكلىرىنىڭ قويۇپ بېرىلىشىنى تەلەپ قىلغانلىقىنى بىلدۈردى.
