ئۆكتىچى پارلامېنت ئەزاسى گىلاد كارىۋ: «ئالدىمىزدىكى سائەتلەردە نېتانياھۇ ۋە ئۇنىڭ يانتاياقلىرى سايلامغا بۇزغۇنچىلىق قىلىش مەقسىتىدە يالغان ۋە قايمۇقتۇرغۇچى دەۋالارنى تارقىتىپ، سىلەرنى ساختا خەۋەر ھەم ئۇچۇرلارغا كۆمۈۋېتىدۇ» دېدى.
ئىسرائىلىيەدىكى ئۆكتىچى پارتىيەلەرنىڭ رەھبەرلىرى باش مىنىستىر بېنيامىن نېتانياھۇ دەۋرىنى ئاخىرلاشتۇرۇش ئۈچۈن پۇقرالارنى بېلەت تاشلاشقا چاقىردى.
«ئىسرائىلىيە بىزنىڭ ئۆيىمىز» پارتىيەسىنىڭ رەھبىرى ۋە سابىق دۆلەت مۇداپىئە مىنىستىرى ئاۋىگدور لىبېرمان ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا خەلققە خىتاب قىلىپ: «بېلەت تاشلاڭلار، نېتانياھۇ دەۋرىگە ۋە ھارېدىلارنىڭ (ئاشقۇن ئورتودوكس يەھۇدىيلار) باشقۇرۇشىغا خاتىمە بېرەيلى» دېدى.
«ياشار» پارتىيەسىنىڭ رەھبىرى گادى ئېيزېنكوت پارتىيەسىنىڭ ئىسرائىلىيەدىكى ئەڭ چوڭ پارتىيەگە ئايلىنىشى كېرەكلىكىنى بىلدۈرۈپ، ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «ئۆزگىرىشنى ئەمەلگە ئاشۇرۇش ۋە نېتانياھۇنى ئاغدۇرۇشنىڭ پەقەت بىرلا يولى بار، ئۇ بولسىمۇ ياشارنىڭ يولىدۇر» دېدى.
ئۆكتىچى پارلامېنت ئەزاسى گىلاد كارىۋمۇ ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا: «ئۆتكەن 4 يىلدىن بۇيان ئېلىپ بېرىۋاتقان كۈرىشىمىزنى بۈگۈن بېلەت تاشلاش ساندۇقىغا ئېلىپ چىقىمىز» دېدى.
كارىۋ ئۆزگىرىشنىڭ مۇھىملىقىنى تەكىتلەپ، بۈگۈننىڭ «4 يىللىق ئۈمىد دەۋرىنىڭ باشلىنىشى» ئىكەنلىكىنى تىلغا ئالدى ھەمدە ئالدىمىزدىكى سائەتلەردە نېتانياھۇ بىلەن ئۇنىڭ يانتاياقلىرى سايلامغا بۇزغۇنچىلىق قىلىش مەقسىتىدە ساختا خەۋەرلەرنى ئەۋج ئالدۇرىدىغانلىقىنى ئەسكەرتىپ، سايلىغۇچىلارنى بېلەت تاشلاشقا ئاكتىپ قاتنىشىشقا چاقىردى.
ئىسرائىلىيەدە پارلامېنتتىكى 120 مىللەت ۋەكىلىنى بېكىتىش ئۈچۈن بېلەت تاشلاش پائالىيىتى داۋاملاشماقتا.
مەزكۇر سايلامدا 30 دىن ئارتۇق پارتىيە ۋە تىزىملىك، % 3.25 لىك سايلام بوسۇغىسىدىن ئۆتۈپ پارلامېنتقا ئەزا كىرگۈزۈش ئۈچۈن بەس-بەستە رىقابەتلەشمەكتە.
