يەمەنلىك ئەمەلدارلار ھۇسىيلارنىڭ ئەدەن خەلقئارا ئايرودرومىنى، شەھەرنىڭ ئەت-تەۋاھى رايونىدىكى بىر پورتنى ۋە ئىككى دېڭىز ياقىسى خەۋپسىزلىك ئەسلىھەسىنى باللىستىك باشقۇرۇلىدىغان بومبىلار بىلەن نىشانغا ئالغانلىقىنى بىلدۈردى.
يەمەن ئۇچۇر-ئالاقە مىنىستىرلىقى، شەنبە كۈنى X ئارقىلىق ئېلان قىلغان باياناتىدا، ئايرودروم ۋە پورتنىڭ قايتىدىن باللىستىك باشقۇرۇلىدىغان بومبا ھۇجۇملىرىغا ئۇچرىغانلىقىنى ئۇقتۇردى. باياناتتا ئادەم ئۆلۈش ياكى زىيان توغرىسىدا ئۇچۇر بېرىلمىدى.
ئىچكى ئىشلار مىنىستىرلىقى ئىككى باللىستىك باشقۇرۇلىدىغان بومبىنىڭ مىنىستىرلىق بىناسى قورۇسىدىكى دېڭىز ياقىسى خەۋپسىزلىك ئىشتابىنى، ئۈچىنچى باشقۇرۇلىدىغان بومبىنىڭ بولسا ئەت-تەۋاھى رايونىدىكى بىر دېڭىز ياقىسى خەۋپسىزلىك بىناسىنى نىشانغا ئالغانلىقىنى ئېلان قىلدى.
سەئۇدى ئەرەبىستان باشچىلىقىدىكى ئىتتىپاقداش قىسىم ئەدەندە پارتلاش ئاۋازلىرى ئاڭلىنىشتىن بۇرۇن سەئۇدى ئەرەبىستاننىڭ غەربىدىكى تائىف ۋە يەنبۇ شەھەرلىرىنى نىشان قىلغان ئىككى باشقۇرۇلىدىغان بومبىنىڭ توسۇپ قېلىنغانلىقىنى بىلدۈرگەن ئىدى.
ھۇجۇملارنىڭ جاۋابكارلىقىنى قىسقا ۋاقىت ئىچىدە ئۈستىگە ئالغان ھۇسىيلار، سەئۇدى ئەرەبىستان كۈچلىرىنىڭ كونتروللۇقىدىكى بىر دېڭىز ئارمىيە بازىسى بىلەن ھەربىي لاگېرنى نىشان قىلغانلىقىنى ئېلان قىلدى.
ھۇسىيلارنىڭ ھەربىي باياناتچىسى يەھيا سەرى، ئۆز قىسىملىرىنىڭ ئەدەندىكى ئەن-نەسر لاگېرىغا ئورۇنلاشتۇرۇلغان سەئۇدى ئەرەبىستان ئەسكەرلىرىنى ۋە دېڭىز ئارمىيە بازىسىنى نىشان قىلغانلىقىنى ئېيىتتى.
يەمەن ئىچكى ئىشلار مىنىستىرلىقى بۇ ھۇجۇملارنىڭ ئەدەندىكى ئاممىۋى ئەسلىھەلەرگە ۋە ھالقىلىق ئۇل ئەسلىھەلەرگە قارىتىلغان ئىلگىرىكى ھۇجۇملاردىن كېيىن يۈز بەرگەنلىكىنى بىلدۈردى. مىنىستىرلىق خەلقئارا ئايرودرومنىڭ ئىلگىرىمۇ باللىستىك باشقۇرۇلىدىغان بومبىلار ۋە ئۇچقۇچىسىز ئايروپىلانلار بىلەن كۆپ قېتىم نىشان قىلىنغانلىقىنى ئەسكەرتتى.
سەئۇدى ئەرەبىستان 2015-يىلىدىن بۇيان يەمەن ھۆكۈمىتىنى ھۇسىيلارغا قارشى قوللاپ كېلىۋاتقان ھەربىي ئىتتىپاققا يېتەكچىلىك قىلماقتا.
يەمەن ھۆكۈمىتىگە قاراشلىق قىسىملار بىلەن ھۇسىيلار ئوتتۇرىسىدىكى يېقىنقى توقۇنۇشلار، 2022-يىلى ھاسىل قىلىنغان ئۇرۇش توختىتىشنىڭ بۇزۇلۇشى بىلەن ئىيۇل ئېيىدا قايتىدىن كەسكىنلەشتى.
ھۇسىيلار يەنە سەئۇدى ئەرەبىستاننىڭ ئېنېرگىيە ئەسلىھەلىرىنى ۋە ئاممىۋى نىشانلىرىنىمۇ ھۇجۇم نىشانى قىىلدى.
