تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر-ئالاقە ئىدارىسىنىڭ باشلىقى بۇرھانەتتىن دۇران ئىجتىمائىي تاراتقۇدىكى باياناتىدا، كارنىينىڭ جۇمھۇر رەئىس رەجەپ تاييىپ ئەردوغاننىڭ تەكلىپىگە بىنائەن زىيارەتكە كېلىدىغانلىقىنى بىلدۈردى.
دۇران بۇ تارىخىي زىيارەت ئارقىلىق ئىككى دۆلەت مۇناسىۋىتىنى ئىستراتېگىيەلىك ھەمكارلىق سەۋىيەسىگە كۆتۈرۈشنىڭ كۆزدە تۇتۇلغانلىقىنى ئېيتتى. ئۇنىڭ بىلدۈرۈشىچە، كۆرۈشۈشلەردە تۈركىيە – كانادا ھەمكارلىقى ئەتراپلىق مۇزاكىرە قىلىنىپ، مۇناسىۋەتلەرنى تەرەققىي قىلدۇرۇش قەدەملىرى ۋە نۆۋەتتىكى رايونلۇق، خەلقئارالىق مەسىلىلەر ھەققىدە پىكىر ئالماشتۇرۇلىدىكەن. زىيارەت جەريانىدا بىر نەچچە ساھە بويىچە كېلىشىم ئىمزالاشمۇ پىلانلانماقتا ئىكەن.
