ئىسپانىيەلىك ياش چولپان لامىن يامال بارسېلونانىڭ ئىسپانىيە بىرلەشمە مۇسابىقىسىدە چېمپىيون بولغانلىقىنى تەبرىكلەۋاتقاندا، ئوچۇق ئاپتوموبىل ئۈستىدىن پەلەستىن بىلەن ھەمدەم ئىكەنلىكى توغرىسىدا سىگنال بەردى.

ئىسپانىيەلىك دەرىجىدىن تاشقىرى چولپان لامىن يامال، بارسېلونانىڭ لا لىگا چېمپىيونلۇقىنى تەبرىكلەش پائالىيىتى جەريانىدا پەلەستىننى قوللايدىغانلىقىنى نامايەن قىلىپ، پۇتبول مەستانىلىرىنىڭ قىزغىن ئالقىشىغا ئېرىشتى.

دۈشەنبە كۈنى توردا كۆپ قېتىم ھەمبەھرىلەنگەن بىرنەچچە ۋىدېيودا، 18 ياشلىق ماھىرنىڭ ئۈستى ئوچۇق بىر ئاپتوبۇستا پەلەستىن بايرىقىنى لەپىلدەتكەنلىكى ۋە قىزغىن ئالقىشلاۋاتقان ئاممىنىڭ ھۆرمىتىگە سازاۋەر بولغانلىقى كۆرۈلىدۇ.

بارسېلونادا ئۆتكۈزۈلگەن چېمپىيونلۇقنى تەبرىكلەش پائالىيىتىدە، ئون مىڭلىغان كىشى پۇتبولچىلارنى كۈتۈۋېلىش ئۈچۈن كوچىلاردا بىر يەرگە جەم بولدى.

بارچا كوماندىسى ئەزەلدىن رەقىبى بولۇپ كەلگەن رېئال مادرىد كوماندىسىنى يەكشەنبە كۈنى 2 گە قارشى 0 نەتىجە بىلەن يېڭىپ، لا لىگادا 29-قېتىملىق چېمپىيونلۇقنى قولغا كەلتۈردى. شۇنىڭ بىلەن، بىرلەشمە مۇسابىقىسىنىڭ چېمپىيونى ئىككىنچى قېتىملىق «ئەل كلاسىكو» مۇسابىقىسىدىن كېيىن بېكىتىلگەن بولدى.

2023-يىلى ئۆكتەبىردە غەززەدە باشلانغان ئىرقىي قىرغىنچىلىقتىن كېيىن، بارسېلونا ئىسپانىيەدىكى پەلەستىن تەرەپدارى پائالىيەتچىلەرنىڭ مۇھىم مەركەزلىرىدىن بىرىگە ئايلاندى.

بۇ شەھەر يەنە كەڭ كۆلەملىك، قەرەللىك پەلەستىن تەرەپدارى نامايىشلىرىغا ساھىبخانلىق قىلدى ۋە رايونغا يۈرگۈزۈلۈۋاتقان قامالنى بۇزۇپ تاشلاشقا تىرىشىۋاتقان ياردەم فىلوتلىرىنىڭ يولغا چىقىش نۇقتىسى سۈپىتىدە مۇھىم رول ئوينىدى.