تۈرك دۆلەتلىرى تەشكىلاتىغا ئەزا دۆلەتلەر ئوتتۇرىسىدا ئىمزالانغان رەقەملىك ئىقتىساد ساھەسىدە ھەمكارلىق ئورنىتىش كېلىشىمى ئارقىلىق ئېلېكتىرونلۇق سودا، رەقەملىك مۇلازىمەت ۋە چېگرا ھالقىغان سانلىق مەلۇمات ئاساسىدىكى ئىقتىسادىي پائالىيەتلەرنىڭ ئالدىدىكى توسالغۇلارنى تۈگىتىش مەقسەت قىلىندى.
تۈركىيە جۇمھۇرىيىتى سودا مىنىستىرلىقى ئېلان قىلغان باياناتتا، «تۈرك دۆلەتلىرى تەشكىلاتىغا ئەزا دۆلەتلەر ھۆكۈمەتلىرى ئوتتۇرىسىدىكى رەقەملىك ئىقتىساد ھەمراھلىق كېلىشىمىنى تەستىقلاش قانۇنى» نىڭ ھۆكۈمەت گېزىتى (رەسمىي گېزىت)تە ئېلان قىلىنغانلىقى بىلدۈرۈلدى.
شۇنىڭ بىلەن بىرگە، باياناتتا تۈركىيەنىڭ بۇ كېلىشىمنىڭ ئىچكى تەستىقلاش جەريانىنى تاماملىغان ئەزەربەيجان ۋە ئۆزبېكىستاندىن قالسىلا ئۈچىنچى دۆلەت ئىكەنلىكىگە ئىشارەت قىلىندى. مەلۇماتلارغا قارىغاندا، قىرغىزىستان بىلەن قازاقىستانمۇ ئىچكى قىسمىدا تەستىقلىغاندىن كېيىن، كېلىشىم رەسمىي كۈچكە ئىگە بولىدىكەن.
باياناتتا، كېلىشىمنىڭ تەپسىلاتلىرى ھەققىدە ئۇچۇر بېرىلىپ: «بۇ كېلىشىم ئارقىلىق تۈرك دۆلەتلىرى تەشكىلاتى ئەزالىرى ئوتتۇرىسىدىكى ئېلېكتىرونلۇق سودا، رەقەملىك مۇلازىمەت ۋە چېگرا ھالقىغان سانلىق مەلۇمات ئاساسىدىكى ئىقتىسادىي پائالىيەتلەرنىڭ توسالغۇلىرى تۈگىتىلىدۇ. بۇ پائالىيەتلەرگە قولايلىق يارىتىلىدۇ ۋە ئورتاق قائىدىلەر ماقۇللىنىدۇ. بۇنىڭ بىلەن رەقەملىك ئىقتىسادتا بىر گەۋدىلەشكەن، مۆلچەرلىگىلى بولىدىغان ھەمكارلىق ئاساسى بارلىققا كېلىدۇ» دېگەنلەر قەيت قىلىندى.
باياناتتا يەنە، بۇ كېلىشىمنىڭ تۈرك دۆلەتلىرىنىڭ سودا ۋە تېخنىكىدا بىر گەۋدىلىشىشىنى كۈچەيتىدىغانلىقى، كارخانىلارنىڭ رەقەملىك بازارلارغا كىرىشىگە قولايلىق يارىتىپ بېرىدىغان يېڭىلىق يارىتىش تېخنىكىلىرىنى قوللىنىشىغا ئىلھام بېرىدىغانلىقى تەكىتلەندى.
