بۇ يىل ئەڭ كۆپ رۇسىيەلىك، گېرمانىيەلىك ۋە ئەنگلىيەلىك ساياھەتچىلەرنى كۈتۈۋالغان ئانتاليادا، ئىيۇن ئېيىدىن باشلاپ ساياھەتچىلىك تېخىمۇ جانلىنىپ كەتتى.
كەسپىي مېھمانساراي باشقۇرغۇچىىرى جەمئىيىتىنىڭ رەئىسى خاقان سائاتچىئوغلۇ ئانادولۇ ئاگېنتلىقى مۇخبىرىغا بەرگەن باياناتىدا، ماي ئېيىنىڭ ئاخىرىغىچە 4 مىليون 800 مىڭ مېھماننى كۈتۈۋالغانلىقىنى بىلدۈردى.
ئامېرىكا، ئىسرائىلىيە ۋە ئىران ئوتتۇرىسىدىكى ئۇرۇشنىڭ ئالدىن زاكاز قىلىش مەزگىلىگە تەسىر كۆرسەتكەنلىكىنى ۋە كىشىلەرنىڭ كۆزىتىش ھالىتىگە ئۆتكەنلىكىنى تىلغا ئالغان سائاتچىئوغلۇ مۇنداق دېدى:
«مۇشۇ ئاينىڭ باشلىرىدىن باشلاپ زاكازلار ئېچىلدى. خۇددى ئالدىنقى يىلىدىكىگە ئوخشاشلا، زاكاز قىلىش تەلىپى ناھايىتى كۆپ بولۇشقا باشلىدى. نۆۋەتتە ئەھۋال ياخشى كېتىۋاتىدۇ، بىز نىشان قىلغان سانغا ئىنتايىن يېقىنلىشىمىز دەپ ئويلايمىز. تىزىملىك تەرتىپى ئۆزگەرمىدى، رۇسىيەلىكلەر 450 مىڭ كىشى بىلەن يەنىلا بىرىنچى ئورۇندا تۇرۇۋاتىدۇ. ئىككىنچى ئورۇندا گېرمانىيەلىكلەر بار، گېرمانىيەلىك ساياھەتچىلەر سانىدا %10 لىك ئېشىش بولدى. ئانتاليادا 390 مىڭ گېرمانىيەلىك مېھماننى كۈتۈۋالدۇق. ئۈچىنچى ئورۇندا ئەنگلىيە، تۆتىنچى ئورۇندا پولشا بار. ئالدىنقى يىلىمۇ تىزىملىك تەرتىپى مۇشۇنداق ئىدى.»
سائاتچىئوغلۇ ئىيۇل ۋە ئاۋغۇست ئايلىرىدىكى زاكازلارنىڭ تېخىمۇ ياخشى ئىكەنلىكىنى قەيت قىلدى.
ئامېرىكا، ئىسرائىلىيە ۋە ئىران ئۇرۇشى مۇساپىسىنى ساياھەت ساھەسىدىكىلەر بولۇش سۈپىتى بىلەن ئاڭلىق ھالدا ئۆتكۈزگەنلىكىنى بايان قىلغان سائاتچىئوغلۇ: «مېھمانساراي باشقۇرغۇچىلىرىمىز ناھايىتى تېز ماسلاشتى، مەدەنىيەت ۋە ساياھەت مىنىستىرىمىز بەرگەن ئۇچۇرلارغا ئاساسەن، ئالدىن زاكاز قىلىش مۇددىتىنى ئۇزارتتۇق. راستىنى ئېيتقاندا، ھازىر شۇنىڭ نەتىجىسىنى كۆرۈۋاتىمىز» دېدى.
ئۆتكەن يىللاردا رۇسىيە-ئۇكرائىنا ئوتتۇرىسىدىكى ئۇرۇش سەۋەبىدىن بولۇپمۇ ئۇكرائىنا بازىرىدا كۆرۈنەرلىك تۆۋەنلەش بولغانلىقىنى ئەسلىتىپ ئۆتكەن سائاتچىئوغلۇ: «ئۇكرائىنا بازىرىدا ئالدىنقى يىلى %20 لىك ئېشىش بولغان ئىدى، ئۇنىڭدىن بۇرۇنقى يىلىمۇ يەنە %20 لىك ئېشىش بولدى، بۇ يىلمۇ كۆرۈنەرلىك ئېشىش بولىدىغانلىقىنى مۆلچەرلەۋاتىمىز. باشقا بازارلارمۇ ئالدىنقى يىلى بىلەن ئوخشاش سەۋىيەدە كېتىۋاتىدۇ» دېدى.
