پاكىستاندا شىددەتلىك يامغۇر ۋە ئۆستەڭ تېشىش ئاپەتلىرى سەۋەبىدىن ھاياتىدىن ئايرىلغانلارنىڭ سانى 37 گە يەتتى.
خەيبەر پەختۇنخوا، پۇنجاپ شۇنداقلا گىلگىت بالتىستان رايونىدا پەسەللىك يامغۇرى سەۋەبىدىن 19-ئىيۇلدىن بىرى تەسىر كۆرسىتىۋاتقان قاتتىق يامغۇرلار، تۇيۇقسىز ئۆستەڭ تېشىپ كېتىش ۋە تاغ گۈمۈرۈلۈپ چۈشۈش ئاپەتلىرىگە يول ئاچماقتا.
دائىرىلەر تۇيۇقسىز ئۆستەڭ تېشىپ كېتىش، تاغ گۈمۈرۈلۈپ چۈشۈش، ۋە توك سوقۇشقا ئوخشاش يامغۇرغا مۇناسىۋەتلىك ۋەقەلەردە خەيبەر پەختۇنخوا دا 20، پۇنجاپتا بولسا 17 كىشىنىڭ ھاياتىدىن ئايرىلغانلىقىنى ئېلان قىلدى.
گىلگىت بالتىستان بىلەن پاكىستاننىڭ كونتروللۇقىدىكى ئازاد جاممۇ كەشمىر رايونىدا قاتتىق يامغۇر كەلتۈرۈپ چىقارغان ئۆستەڭ تېشىش ۋە تاغ گۈمۈرۈلۈش نەتىجىسىدە ئېتىزلاردىكى زىرائەتلەر ۋە يەرلىك ئاھالىلەرنىڭ ئۆيلىرى زىيانغا ئۇچرىدى.
ھىندىستاننىڭ شىمالىي شەرقىگە جايلاشقان ئاسسام ئۆلكىسىدە قاتتىق يامغۇر كەلتۈرۈپ چىقارغان ئۆستەڭ تېشىپ كېتىش ئاپىتىدە قازا قىلغانلارنىڭ سانى بولسا 41 گە چىقتى.
ئاسسام ئۆلكىلىك ئاپەتنى تەكشۈرۈش ئىدارىسى، ئاخىرقى 24 سائەت ئىچىدە ئۆستەڭ تېشىش سەۋەبىدىن يەنە 10 كىشىنىڭ ھاياتىدىن ئايرىلغانلىقىنى ئېلان قىلدى.
ئاسسام ئۆلكىسىدىكى ئۆستەڭ تېشىش ئاپىتىدە ئۆلگەنلەرنىڭ سانى 41 گە يەتتى، ئۆلكىنىڭ 25 رايونىدا جەمئىي 727 مىڭ كىشى ئاپەتنىڭ ئېغىر تەسىرىگە ئۇچرىدى.
ئاسسام ئۆلكىسىنىڭ باش مىنىستىرى ھىمانتا بىسۋا سارما 100 دىن ئارتۇق ئادەمنىڭ يوقالغانلىقىنى ۋە قازا قىلغانلار سانىنىڭ ئېشىپ كېتىشى مۇمكىنلىكىنى ئېيتتى.
ئۆلكىدە داۋاملىشىۋاتقان قۇتقۇزۇش خىزمەتلىرىگە ھىندىستان ئارمىيەسىمۇ ياردەملەشمەكتە.
