ئامېرىكانىڭ مۇرەسسە قىلىشى بىلەن 10- ۋە 11-نويابىر كۈنلىرى ئۆتكۈزۈلىدىغان مەزكۇر سۆھبەت توغرىسىدا توختالغان باررو، RTL رادىيوسىنىڭ زىيارىتىنى قوبۇل قىلىپ، ياۋروپانىڭ بۇ يىغىنغا قاتنىشىدىغان ياكى قاتناشمايدىغانلىقى ھەققىدىكى سوئالغا جاۋاب بەردى. ئۇ ياۋروپا ۋەكىللىرىنىڭ ئەبۇ زەبىدىكى سۆھبەتتە چوقۇم ھازىر بولىدىغانلىقىنى تەكىتلەپ: «بۇ سۆھبەتتە فىرانسىيەگە كىمنىڭ ۋەكىللىك قىلىدىغانلىقىنى ھازىرچە ئېنىق ئېيتالمايمەن، ئەمما فىرانسىيە چوقۇم ئۇ يەردە بولىدۇ» دېدى.

باررو يەنە مۇنداق دېدى: «ياۋروپالىقلار يېقىنقى ھەپتىلەردە ئاۋازىنى تېخىمۇ يۇقىرى كۆتۈرۈپ، قىتئەنىڭ كەلگۈسىگە بىۋاسىتە مۇناسىۋەتلىك بولغان ھېچقانداق سۆھبەتتە بىزنىڭ كۈتۈش ۋە تەلەپلىرىمىزگە سەل قاراشقا بولمايدىغانلىقىنى ئامېرىكالىق مۇرەسسەچىلەرگە ئېنىق يەتكۈزدى».

ئىگىلىنىشىچە، ئامېرىكا پىرېزىدېنتى دونالد ترامپنىڭ ئالاھىدە ۋەكىلى ستېۋ ۋىتكوف ئىلگىرى ئامېرىكانىڭ مۇرەسسەچىلىكىدە 10- ۋە 11-نويابىر كۈنلىرى ئەبۇ زەبىدە رۇسىيە بىلەن ئۇكرائىنا ئوتتۇرىسىدا خىزمەت گۇرۇپپىلىرى سەۋىيەسىدە سۆھبەت ئۆتكۈزۈلىدىغانلىقىنى مەلۇم قىلغان ئىدى. ئۇنىڭ بىلدۈرۈشىچە، بۇ قېتىمقى سۆھبەتتە ئۇرۇشتىن كېيىنكى بىخەتەرلىك ئورۇنلاشتۇرۇشلىرى، رايوندىكى جىددىيچىلىكنى پەسەيتىش، ئىنسانپەرۋەرلىك ياردەم خىزمەتلىرى شۇنداقلا تىنچلىقنى ئىشقا ئاشۇرۇش ئۈچۈن كېيىنكى قەدەمدە تاشلىنىدىغان قەدەملەر ئەتراپلىق مۇزاكىرە قىلىنىدىكەن.