جۇمھۇر رەئىس رەجەپ تاييىپ ئەردوغان: «8-نويابىر ئەزەربەيجاننىڭ زەپەر كۈنى. شۇڭا مەن پەۋقۇلئاددە بىرەر ئەھۋال كۆرۈلمىسىلا، 8-نويابىر كۈنى ئەزەربەيجاننى زىيارەت قىلىشنى ئويلىشىۋاتىمەن. ئىنشائاللاھ، بۇ زىيارەت مۇناسىۋىتى بىلەن زۆرۈر قەدەملەرنى تاشلاش پۇرسىتىگە ئېرىشىمىز» دېدى.

ئەردوغان جەنۇبىي كورېيە زىيارىتىنى ئاخىرلاشتۇرۇپ، مەملىكەتكە قايتىش سەپىرىدە، ئايروپىلاندا بايانات ئېلان قىلدى ۋە مۇخبىرلارنىڭ سوئاللىرىغا جاۋاب بەردى.

ئەزەربەيجان بىلەن بولغان مۇناسىۋەتلەر

جۇمھۇر رەئىس ئەردوغان: «ئەزەربەيجان بىلەن بولغان مۇناسىۋەتلەرگە قانداق باھا بېرىسىز؟ مۇناسىۋەتلەردە كىرىزىس بار دېگەن كۆزقاراشلارغا قانداق قارايسىز؟» دېگەن سوئالغا مۇنداق جاۋاب بەردى.

ئۇ مۇنداق دېدى: «8-نويابىر ئەزەربەيجاننىڭ زەپەر كۈنى. شۇڭا مەن كۈتۈلمىگەن بىرەر پەۋقۇلئاددە ئەھۋال يۈز بەرمىسىلا، 8-نويابىر كۈنى ئەزەربەيجاننى زىيارەت قىلىشنى ئويلىشىۋاتىمەن. ئىنشائاللاھ، بۇ زىيارەت مۇناسىۋىتى بىلەن زۆرۈر قەدەملەرنى بېسىش پۇرسىتىمىز بولىدۇ. ئەزەربەيجان پىرېزىدېنتى ھۆرمەتلىك ئىلھام ئەلىيېۋ بىلەن تېلېفوندا كۆرۈشتۈم. ئەلۋەتتە، بۇ ئارىلىقتا ئىستىخبارات ئىدارىمىزنىڭ باشلىقىنى ۋە تاشقى ئىشلار مىنىستىرىمىزنى ئەزەربەيجانغا ئەۋەتتىم. ئۇنىڭدىن سىرت، مەيلى ئىلھام ئەپەندى بىلەن بولسۇن، مەيلى رەپىقىلىرىمىز ئوتتۇرىسىدا بولسۇن يەنە تېلېفون دىپلوماتىيەسى داۋاملاشتى ۋە داۋاملىشىۋاتىدۇ. ئۇلارمۇ 8-چېسلادىكى زەپەر بايرىمىغا ئىنتايىن زور ئەھمىيەت بېرىۋاتىدۇ. مەن ھەمىشە ئېيتىپ كېلىۋاتقىنىمدەك، بىزنىڭ ئەزەربەيجان بىلەن بولغان مۇناسىۋىتىمىز ئادەتتىكى كلاسسىك دىپلوماتىك ئالاقىلەرنىڭ كۆپ يۇقىرىسىدا تۇرىدۇ. ئىككى دۆلەتنىڭ ئۈزۈلمەس رىشتىسى- ئورتاق تارىخىمىز، مەدەنىيىتىمىز، تەقدىرىمىز ۋە كەلگۈسىمىزنىڭ مەھسۇلىدۇر. تۈركىيە ۋە ئەزەربەيجان قېرىنداشلىقىنىڭ، خۇدايىم بۇيرۇسا، ھالقىپ ئۆتەلمەيدىغان ھېچقانداق توسالغۇسى يوقتۇر.»