ياپونىيە مېتېئورولوگىيە ئىدارىسىنىڭ سانلىق مەلۇماتلىرىغا ئاساسلانغاندا، پايتەخت توكيودا 27-ئاۋغۇستتىن بۇيان ھەر كۈنى يامغۇر ياققانلىقى خاتىرىلەنگەن.
كىيودو خەۋەر ئاگېنتلىقىنىڭ بىلدۈرىشىچە، يېقىنلىشىۋاتقان تەيفۇڭ بورانلىرى، تۇراقلىق كۈز يامغۇرى سېپى ۋە تۆۋەن بېسىم ئويمانلىقىنىڭ تەسىرى بىلەن ئۇزىراپ كەتكەن يامغۇرلۇق ھاۋارايى تارىختىن ئورۇن ئالغان.
ئالدىنقى رېكورت، 2019-يىلى 27-ئىيۇندىن 29-ئىيۇلغىچە خاتىرىلەنگەن ئۇدا 33 كۈنلۈك يامغۇر يېغىش جەريانى ئىدى.
نۆۋەتتىكى جەرياندىكى ئەڭ قاتتىق يامغۇر، 156 مىللىمېتىر بىلەن 21-سېنتەبىر مەركىزىي توكيودا ئۆلچەنگەن. دۈشەنبە كۈنىگىچە مەركىزىي توكيودىكى ئومۇمىي يامغۇر مىقدارى 629 مىللىمېتىرغا يەتكەن بولۇپ، بۇ سان سېنتەبىر ئېيىدىكى ئوتتۇرىچە يامغۇر مىقدارىنىڭ تەخمىنەن ئۈچ ھەسسىسىگە توغرا كېلىدۇ.
شەرقىي ۋە غەربىي ياپونىيە ئېغىر تەسىر ئاستىدا
سەيشەنبە كۈنى يامغۇر، شەرقىي ۋە غەربىي ياپونىيەنىڭ كۆپ قىسمىنىمۇ ئۆز تەسىرى ئاستىغا ئالدى.
ئۇزۇنغا سوزۇلغان بۇ يامغۇرلۇق مەزگىلنىڭ دەرھال ئاخىرلاشمايدىغاندەك قىلىدۇ. دوكلاتلارغا ئاساسلانغاندا، ئېغىر دەرىجىدە تەسىرىنى داۋاملاشتۇرۇۋاتقان كۈز يامغۇرنىڭ پەيشەنبە كۈنىگىچە بولۇپمۇ شەرقىي ياپونىيەدە داۋاملىشىشى مۆلچەرلەنمەكتە.
ياپونىيەنىڭ كۈز يامغۇرى پەسىللىك ھاۋا ماسسىلىرىنىڭ دۆلەت ئۈستىدە ئۆزئارا تەسىر كۆرسىتىشى بىلەن ئادەتتە ئۇزۇن مۇددەتلىك مۇقىمسىز ھاۋا شارائىتلىرىنى ئېلىپ كېلىدۇ.
