رەجەپ تاييىپ ئەردوغان تۈركىيەنىڭ سۈرىيە خەلقىنى قاتناشتىن مائارىپقىچە، بىخەتەرلىكتىن سودىغىچە، ساغلاملىقتىن ئىجتىمائىي مۇلازىمەتلەرگىچە كەڭ ساھەدە قوللاشنى داۋاملاشتۇرۇۋاتقانلىقىنى ئېيتتى.
ئىسلام ھەمكارلىق تەشكىلاتىنىڭ ئىقتىسادىي ۋە سودا ھەمكارلىق دائىمىي كومىتېتى دائىرىسىدە سۈرىيەنى قوللاش ئۈچۈن ئالاھىدە بىر پىروگرامما يولغا قويۇلدى. جۇمھۇر رەئىس رەجەپ تاييىپ ئەردوغان دۈشەنبە كۈنى (بۈگۈن) بايانات بېرىپ، ئىسلام دۇنياسىنىڭ قوللىشىنىڭ، سۈرىيەنىڭ سىياسىي بىرلىكى ۋە زېمىن پۈتۈنلۈكىنى قوغداشتا ئىنتايىن مۇھىم ئىكەنلىكىنى تەكىتلىدى.
ئەردوغان دۈشەنبە كۈنى ئىستانبۇلدا ئۆتكۈزۈلگەن 41-نۆۋەتلىك ئىقتىسادىي ۋە سودا ھەمكارلىق دائىمىي كومىتېتى مىنىستىرلار يىغىنىدا: «ئىنسانىي ۋە تەشكىلىي ئىقتىدارنى كۈچەيتىشكە تۆھپە قوشىدىغان بۇ پىروگرامما بىلەن مائارىپ، مۇتەخەسسىس ئالماشتۇرۇش، ئېھتىياج ئانالىزى ۋە مۇمكىنچىلىك تەتقىقاتى قاتارلىق ساھەلەردە سۈرىيەنى تۈرلەر بويىچە قوللاپ-قۇۋۋەتلەشنى داۋاملاشتۇرىمىز... تەخمىنەن 14 يىل جەريانىدا سۈرىيەلىك قېرىنداشلىرىمىز ناھايىتى ئېغىر بەدەل تۆلىدى. بەئس ھاكىمىيىتىنىڭ ۋە تېررورلۇق تەشكىلاتلىرىنىڭ ھۇجۇملىرىدا 1 مىليونغا يېقىن سۈرىيەلىك قېرىندىشىمىز جېنىدىن ئايرىلدى. 3 مىليون 600 مىڭى تۈركىيەگە كېلىش بىلەن بىرگە، مىليونلارچىسى باشقا دۆلەتلەرگە كۆچۈشكە، ھىجرەت قىلىشقا مەجبۇر بولدى. بۇ جەرياندا سۈرىيەلىك مۇھاجىرلارغا ئەنسارىلار روھى بىلەن مېھماندوستلۇق قىلدۇق» دېدى.
تۈركىيەنىڭ قېرىنداشلىق ۋە قوشنىدارچىلىق بۇرچىنى ئەڭ گۈزەل شەكىلدە ئادا قىلىشقا تىرىشقانلىقىنى بىلدۈرگەن ئەردوغان، «ئاللاھقا ھەمدۇسانا بولسۇنكى، ئاخىرىدا غەلىبىگە ئېرىشكەنلەر سۈرىيەلىك مەزلۇملار بولدى» دېگەنلەرنى قەيت قىلدى.
ئەردوغان سۈرىيەنى 14 يىل بويىچە قان كۆلىگە ئايلاندۇرغان زۇلۇمنىڭ، 8-دېكابىر ئىنقىلابى بىلەن ئاخىرلاشقانلىقىنى ۋە سۈرىيەنىڭ پىرېزىدېنت ئەھمەد شارا (شەرئ) نىڭ ئەقىل-پاراسەتلىك سىياسىتى سايىسىدا قايتىدىن ئۆزىنى ئەسلىگە كەلتۈرۈش جەريانىغا كىرگەنلىكىنى سۆزلىرىگە ئىلاۋە قىلدى.
ئۇ يەنە، تۈركىيەنىڭ قاتناشتىن مائارىپقىچە، بىخەتەرلىكتىن سودىغىچە، ساغلاملىقتىن ئىجتىمائىي مۇلازىمەتلەرگىچە بولغان نۇرغۇن ساھەلەردە سۈرىيە خەلقىنى قوللاپ-قۇۋۋەتلەشنى داۋاملاشتۇرۇۋاتقانلىقىنى تەكىتلەپ مۇنداق دېدى: «دۆلەتنىڭ سىياسىي بىرلىكى ۋە زېمىن پۈتۈنلۈكىنىڭ قوغدىلىشى، بارلىق قاتلاملىرى بىلەن سۈرىيەلىك قېرىنداشلىرىمىزنىڭ مەڭگۈلۈك باياشاتلىققا ئېرىشىشى نۇقتىسىدا، تەشكىلاتىمىز ۋە ئىسلام دۇنياسىنىڭ قوللىشى ناھايىتىمۇ مۇھىم. سۈرىيەنىڭ رايون ئىقتىسادلىرى بىلەن بىرلىشىشى، ھەم سۈرىيەگە ھەم رايونىمىزغا كونكرېت تۆھپىلەرنى سۇنىدۇ.»
