يەمەندىكى ئىران قوللاۋاتقان ھۇسىيلار («ئەنسارۇللاھ» ھەرىكىتى) قىزىل دېڭىزدا سەئۇدى ئەرەبىستاننىڭ ئىككى نېفىت پاراخوتىغا ئۇچقۇچىسىز ھاۋا ئاپپاراتى ۋە باشقۇرۇلىدىغان بومبىلار بىلەن ھۇجۇم قىلغانلىقىنى ئېلان قىلدى.
ھۇسىيلارنىڭ ھەربىي باياناتچىسى يەھيا سەرىي ئېلان قىلغان سىنلىق باياناتىدا، «ENCELIA» ۋە «LAYLA» ناملىق سەئۇدى ئەرەبىستانغا تەۋە ئىككى نېفىت پاراخوتىغا زەربە بېرىلگەنلىكىنى بىلدۈردى.
مەزكۇر نېفىت پاراخوتلىرىنىڭ ئۆتۈشنى چەكلەش قارارىغا خىلاپلىق قىلغانلىقى ئۈچۈن زەربە ئوبيېكتى قىلىنغانلىقىنى تەكىتلىگەن سەرىي، «بۇ ھەرىكەت كۆپلىگەن باللىستىك بومبا، چارلىغۇچى باشقۇرۇلىدىغان بومبا ۋە ئۇچقۇچىسىز ھاۋا ئاپپاراتلىرى ئارقىلىق ئەمەلگە ئاشۇرۇلغان بولۇپ، نىشانلارغا ئېنىق زەربە بېرىلدى» دېدى.
تەخمىنەن 10 پاراخوتنىڭ كەينىگە قايتىشىغا كاپالەتلىك قىلىندى
يەھيا سەرىي «ئوخشاش دائىرىدە يەمەن قوراللىق كۈچلىرى (يەنى ھۇسىيلار) تەخمىنەن 10 پاراخوتنى چېكىنىشكە ۋە كەينىگە قايتىشقا مەجبۇر قىلدى» دېدى.
سەئۇدى ئەرەبىستان ھۆكۈمىتىگە بىۋاسىتە ئاگاھلاندۇرۇش بەرگەن ھۇسىيلارنىڭ ھەربىي باياناتچىسى يەنە مۇنداق دېدى: «يەمەن قوراللىق كۈچلىرى سۈپىتىدە شۇنى تەكىتلەيمىزكى، ئەگەر دۈشمەن سەئۇدى ئەرەبىستان دۆلىتىمىزگە قارشى ھەر قانداق ئەخمەقلىق سادىر قىلسا ياكى ھۇجۇم قىلىشقا ئۇرۇنسا، زېمىنىنىڭ ئىچكىرىسىگىچە سوزۇلىدىغان چوڭ ھەرىكەتلەر بىلەن قايتۇرما زەربىگە ئۇچرايدۇ».
«ئەنسارۇللاھ» ھەرىكىتى ھەربىي باياناتچىسى سەرىي سەئۇدى ئەرەبىستاننى «تەخمىنەن 12 يىلدىن بۇيان يەمەن خەلقىگە قارشى ئومۇميۈزلۈك قورشاۋ يۈرگۈزۈش، دۆلەتنىڭ بايلىقلىرىنى بۇلاڭ-تالاڭ قىلىش، پورتلارنى ۋە ئايرودروملارنى قۇرۇقلۇق، دېڭىز ھەمدە ھاۋادىن مۇھاسىرىگە ئېلىپ ،خەلقنىڭ تارتىۋاتقان ئازابلىرىنى بەرداشلىق بەرگۈسىز دەرىجىگە يەتكۈزۈش» بىلەن ئەيىبلىگەنىدى.
