فىرانسىيەدە ئارىسىدا مەمۇرلارمۇ بولغان ئوخشاش بولمىغان ساھە خادىملىرى، مائاش ئۆستۈرۈش تەلىپى بىلەن دۆلەت مىقياسىدا ئىش تاشلىدى.
مائارىپ، سەھىيە، قاتناشقا ئوخشاش پەرقلىق ساھە خادىملىرى ۋە مەمۇرلار ئىشچىلار ئۇيۇشمىلىرىنىڭ چاقىرىقى بىلەن ئىش تاشلاشقا قاتناشتى.
ئىش تاشلاش دائىرىسىدە مەمۇرلارنىڭ، كۈن ئىچىدە 170 تىن ئارتۇق نۇقتىدا نامايىش ئۆتكۈزۈشى كۈتۈلمەكتە.
پايتەخت پارىژدىكى نامايىش شۇ يەرنىڭ ۋاقتى سائەت 14:00 تە تارىخىي جۇمھۇرىيەت مەيدانىدا باشلىنىدۇ.
ھۆكۈمەتنىڭ 2027-يىللىق خامچوت دائىرىسىدە مەمۇرلار ئۈچۈن مائاش ئۆستۈرۈشنى پىلانلىمىغانلىقىغا نارازىلىق بىلدۈرگەن مەمۇرلار، مائاشلىرىنىڭ ئۆستۈرۈلۈشىنى تەلەپ قىلماقتا.
بۇ جەرياندا، خىزمەت شارائىتلىرىنىڭ ياخشىلىنىشىنى ۋە تېخىمۇ كۆپ ماددىي ئىمكانىيەت بىلەن خادىم تەلەپ قىلغان ئوت ئۆچۈرۈش ئورگىنىمۇ كۈن ئىچىدە پارىژدا ئايرىم بىر يۈرۈش نامايىشى ئۆتكۈزىدۇ. ئوت ئۆچۈرۈش خادىملىرىنىڭ كېيىنچە مەمۇرلار ئۆتكۈزگەن نامايىشقا قوشۇلۇشى كۈتۈلمەكتە.
ئاۋىياتسىيە ۋە ئاممىۋى قاتناش ساھەسىدىكى خادىملارمۇ ئىش تاشلاشقا قاتناشقان بولۇپ، پارىژ، مارسېل ۋە سىتراسبۇرگدىكىلەرنى ئۆز ئىچىگە ئالغان ئوخشاش بولمىغان ئايرودۇرۇملاردا ئاۋىياتسىيە قاتنىشىدا كېچىكىش ۋە توختاپ قېلىشلارنىڭ يۈز بېرىدىغانلىقى مۆلچەرلەنمەكتە.
يەنە بىر تەرەپتىن، پارىژ بىلەن ئەتراپى ئوتتۇرىسىدا قاتنايدىغان RER C، RER E ۋە RER D قاتارلىقلارنى ئۆز ئىچىگە ئالغان پايتەختنىڭ ئاممىۋى قاتناش تورىدا كۈن ئىچىدە ئېغىر دەرىجىدە توختاپ قېلىشلارنىڭ يۈز بېرىشى كۈتۈلمەكتە.
تولۇق ئوتتۇرا مەكتەپلەردە نامايىشلار داۋاملاشماقتا
تولۇق ئوتتۇرا مەكتەپ ئۇيۇشمىسى ئىتتىپاقى، ئالدىنقى ھەپتىدىن بۇيان مائارىپ شارائىتلىرىنىڭ ياخشىلىنىشى ئۈچۈن دۆلەت مىقياسىدا نامايىش قىلىۋاتقان تولۇق ئوتتۇرا مەكتەپ ئوقۇغۇچىلىرىنى، مەكتەپ بىنالىرىنىڭ كىرىش ئېغىزلىرىنى تاقاشنى داۋاملاشتۇرۇشقا چاقىردى.
ئومۇمىي ئىشچىلار ئۇيۇشمىسى (CGT) باش كاتىپى سوفى بىنېت مېھمان بولۇپ قاتناشقان فىرانسىيە BFMTV قانىلىدا، ھۆكۈمەتنى تولۇق ئوتتۇرا مەكتەپ ئوقۇغۇچىلىرىنىڭ «غەزىپى» نى چۈشىنىشكە ۋە ئۇلارغا ئارىلىشىش ئۈچۈن ساقچى ئەۋەتىشنى توختىتىشقا چاقىردى.
بىنېت: «تولۇق ئوتتۇرا مەكتەپ ئوقۇغۇچىلىرى ئۈستەل، ئورۇندۇق، ئوقۇتقۇچى تەلەپ قىلىۋاتىدۇ ۋە ئۇلارغا خەۋپسىزلىك قىسىملىرىنى ئەۋەتىش ئارقىلىق جاۋاب بېرىلىۋاتىدۇ» دېدى ھەمدە بۇ جاۋابنى خەتەرلىك دەپ قارايدىغانلىقىنى ئېيتتى.
فىرانسىيە ئىچكى ئىشلار مىنىستىرى لورېنت نۇنېز تولۇق ئوتتۇرا مەكتەپ ئوقۇغۇچىلىرىنىڭ تۈنۈگۈنكى نامايىشلىرى دائىرىسىدە 164 كىشىنىڭ نازارەتكە ئېلىنغانلىقىنى، 12 خەۋپسىزلىك خادىمى، 8 ئوقۇتقۇچى ۋە تەخمىنەن 12 ئوقۇغۇچىنىڭ يارىلانغانلىقىنى ئېلان قىلغان ئىدى.
