ھۆكۈمەت تەرەپنىڭ سەيشەنبە كۈنى كېچىدە ئېلان قىلغان سانلىق مەلۇماتلىرىغا ئاساسلانغاندا، كونگو دېموكراتىك جۇمھۇرىيىتىدە ئېنىقلاپ چىقىلغان ئېبولا ۋىرۇسى بىلەن يۇقۇملانغۇچىلارنىڭ سانى 5 مىڭدىن ئاشقان. سەھىيە دائىرىلىرى بولسا يۇقۇمغا قارشى كۈرەش تىرىشچانلىقلىرىنىڭ جانغا زامىن بولىدىغان بۇ كېسەللىكنى كونترول قىلىشتا يېتەرسىز قېلىۋاتقانلىقى توغرىسىدا ئاگاھلاندۇرۇش بەرمەكتە.
خەلق سەھىيە ئىنستىتۇتىنىڭ بىلدۈرۈشىچە، دۆلەتتىكى 17-قېتىملىق ئېبولا يۇقۇمى ئىيۇل ئېيىنىڭ ئاخىرىدا يۇقۇملانغۇچىلار سانى جەھەتتە تارىختىكى ئەڭ يۇقىرى سەۋىيەگە يەتكەن، ھەپتە ئاخىرىغىچە ھاياتىدىن ئايرىلغانلار سانى 2 مىڭ 378 گە يەتكەن.
ئىنستىتۇتنىڭ ئەڭ يېڭى دوكلاتىدا 5 مىڭ 21 كىشىنىڭ ئېبولا ۋىرۇسى بىلەن يۇقۇملانغانلىقى ئەسكەرتىلگەن. بۇ ئەھۋال مەزكۇر يۇقۇمنى مەيلى يۇقۇملىنىش ياكى ئۆلۈم سانى جەھەتتىن بولسۇن، غەربىي ئافرىقادا 2014-يىلىدىن 2016-يىلىغىچە داۋاملاشقان ئېبولا يۇقۇمىدىن كېيىنكى دۇنيادىكى ئەڭ ئېغىر ئىككىنچى يۇقۇمغا ئايلاندۇردى.
مەزكۇر يۇقۇم ھازىرچە تەستىقلانغان ۋاكسىنىسى ياكى ئالاھىدە داۋالاش ئۇسۇلى بولمىغان «بوندىبۇگيو» تىپىدىكى ئېبولا ۋىرۇسىدىن كېلىپ چىققان.
يۇقۇم 15-مايدا باشلانغانلىقى ئېلان قىلىنغاندىن بۇيان تېز سۈرئەتتە تارقالدى. دۆلەتنىڭ سەھىيە ئۇل ئەسلىھەلىرىنىڭ ئاجىزلىقى، ئاھالىنىڭ كېسەللىككە قارشى تۇرۇش كۈچىنىڭ تۆۋەنلىكى، مۇقىمسىزلىق ۋە يۇقۇمغا تاقابىل تۇرۇش ئەترەتلىرىنىڭ نارازىلىق نامايىشلىرى سەۋەبىدىن، يۇقۇملانغۇچىلارنى ئېنىقلاپ چىقىش ۋە كونترول قىلىش خىزمەتلىرى ئاقساپ قالماقتا.
