بابۇل مەندەپ ۋە ئەتراپىدا 20-ئىيۇلدىن بۇيان كەسكىنلىك ئاشتى. خۇسىيلار سەئۇدى ئەرەبىستانغا چېتىشلىق پاراخوتلارغا قارىتا «دېڭىز قامىلى» ئېلان قىلغان ئىدى.

يەمەندە ئىراننىڭ قوللىشى ئاستىدىكى خۇسىيلارنىڭ بابۇل مەندەپ بوغۇزىدا ھۇجۇم نىشانى قىلغان سودا پاراخوتى ۋە قۇتقۇزۇش ئەترەتىگە قارىتىلغان ھۇجۇملىرىدا ھاياتىدىن ئايرىلغانلارنىڭ سانى 7 گە، يارىلانغانلار سانى 11 گە ئۆرلىدى.

يەمەن ھۆكۈمىتىگە قاراشلىق دۆلەتلىك قارشىلىق كۆرسىتىش قىسىملىرى تەرىپىدىن ئېلان قىلىنغان باياناتتا، يەمەنگە تەۋە «تەھامە» ئاتلىق سودا پاراخوتىنىڭ خۇسىيلار تەرىپىدىن نىشانغا ئېلىنىشى نەتىجىسىدە خادىملاردىن 4 پاكىستانلىق ۋە 1 ھىندونېزىيەلىك بولۇپ 5 كىشىنىڭ ھاياتىدىن ئايرىلغانلىقى، 7 كىشىنىڭ يارىلانغانلىقى بىلدۈرۈلدى.

خادىملارنى قۇتقۇزۇش ۋە پاراخوتنى تارتىش خىزمەتلىرىگە قاتناشقان دېڭىز كۈچلىرى ۋە قىرغاق ئامانلىق ئەترەتىنىڭمۇ ئۇچقۇچىسىز ھاۋا ئاپپاراتى بىلەن ھۇجۇم نىشانى قىلىنغانلىقى بىلدۈرۈلگەن باياناتتا، بۇ ھۇجۇمدا 2 دېڭىز ئارمىيە خادىمىنىڭ ھاياتىدىن ئايرىلغانلىقى، 4 كىشىنىڭ يارىلانغانلىقى ئەسكەرتىلدى.

شۇنىڭ بىلەن ھۇجۇملاردا ھاياتىدىن ئايرىلغانلارنىڭ سانى 7 گە، يارىلانغانلارنىڭ سانى بولسا 11 گە كۆتۈرۈلدى.

يەمەن قاتناش مىنىستىرلىقىنىڭ باياناتىدا، خۇسىيلارنىڭ «تەھامە» ئاتلىق سودا پاراخوتىغا بابۇل مەندەپ بوغۇزىدا كېتىۋاتقان ۋاقتىدا ئارقا-ئارقىدىن 3 باللىستىك باشقۇرۇلىدىغان بومبا بىلەن ھۇجۇم قىلغانلىقى بىلدۈرۈلگەن ئىدى.

مىنىستىرلىق ھۇجۇمنى ئەيىبلەپ «تېررورلۇق جىنايىتى» دەپ تەرىپلىگەن ئىدى.

بابۇل مەندەپ ۋە ئەتراپىدا 20-ئىيۇلدىن بۇيان كەسكىنلىك ئاشتى. خۇسىيلار سەئۇدى ئەرەبىستانغا چېتىشلىق پاراخوتلارغا قارىتا «دېڭىز قامىلى» ئېلان قىلغان ئىدى.

سەئۇدى ئەرەبىستانمۇ بابۇل مەندەپ بوغۇزىدا پاراخوت قاتنىشى بىخەتەرلىكىنى كاپالەتكە ئىگە قىلىش مەقسىتىدە ئامېرىكا، يەمەن، كۇۋەيت، ئومان، ئىيوردانىيە، سودان، ماراكەش، مالدېۋ، باڭلادېش ۋە يېڭى زېلاندىيە قاتارلىق دۆلەتلەردىن تەشكىل تاپقان مۇداپىئە مەقسەتلىك دېڭىز ئىتتىپاقى قۇرۇلغانلىقىنى ئېلان قىلغان ئىدى.