مالىدا تۈركىيە مۇداپىئە سانائىتىنىڭ ئىشتىراك قىلىشىدا ئۆتكۈزۈلىدىغان «Bamako Expo 2026» يەرمەنكىسى ئافرىقا قىتئەسىنىڭ خەۋپسىزلىك ئەندىشىلىرىنى ھەل قىلىدىغان مۇھىم بىر مەركەزگە ئايلانماقتا.
«Bamako Expo 2026» يەرمەنكىسى ساھېل رايونىنى خەۋپسىزلىك كىرىزىسى رايونىدىن ئافرىقانىڭ ئالدىنقى قاتاردىكى مۇداپىئە سانائىتى ئۇچرىشىش نۇقتىسىغا ئايلاندۇرۇشنى نىشان قىلماقتا. تۈركىيە بۇ يەرمەنكىدىكى ئاساسلىق خەلقئارالىق قاتناشقۇچىلارنىڭ بىرىدۇر.
9-نويابىردىن 13-نويابىرغىچە مالىنىڭ پايتەختى باماكودا ئۆتكۈزۈلىدىغان بۇ پائالىيەتتە، ئافرىقادىكى 54 دۆلەتنىڭ ھەممىسىدىن كەلگەن يۇقىرى دەرىجىلىك ھەيئەتلەر ۋە مۇداپىئە شىركەتلىرى، شۇنداقلا ئافرىقا سىرتىدىكى دۆلەتلەرنىڭ ۋەكىللىرى بىر يەرگە جەم بولىدۇ.
«BAMEX» يەرمەنكىسى ئىجرائىيە كومىتېتىنىڭ رەئىسى ۋە «The Peak Defense» شىركىتىنىڭ باش ئىجرائىيە ئەمەلدارى ھارۇن ساراچ تۈركىيەنىڭ بۇ يەرمەنكىگە قاتنىشىشىنىڭ مۇھىملىقىنى تەكىتلىدى.
ھارۇن ساراچ: «BAMEX يەرمەنكىسىنىڭ تۈركىيە مۇداپىئە شىركەتلىرىنى كۈتۈۋېلىش ئۈچۈن لايىھەلەنگەنلىكىنى ئەسكەرتتى ۋە ئۆتكەن يىللىق تۇنجى يەرمەنكىنىڭ نۇرغۇن تۈرك شىركەتلىرىنى ھەمدە تەخمىنەن 35 دۆلەتتىن كەلگەن ۋەكىللەرنى جەلپ قىلغانلىقىنى قەيت قىلدى.
ھارۇن ساراچ سۆزىنى داۋاملاشتۇرۇپ: «بۇ بىزنىڭ تۇنجى پائالىيىتىمىز بولۇشىغا قارىماي، ھەم قاتناشقۇچىلار ھەم رەسمىي ھەيئەتلەر ئۈچۈن قولغا كەلتۈرۈلگەن نەتىجىلەر ئىنتايىن ئۈنۈملۈك بولدى» دېدى. ئۇ يەنە «BAMEX 2026» يەرمەنكىسىنىڭ پۈتۈنلەي خەلقئارالىق سەۋىيەدە ئۆتكۈزۈلىدىغانلىقىنى، تەشكىللىگۈچىلەرنىڭ تۇنجى پائالىيەتكە سېلىشتۇرغاندا رەسمىي ھەيئەتلەر سانىنىڭ ئىككى ھەسسە، قاتناشقان شىركەتلەر سانىنىڭ بولسا ئۈچ ھەسسە ئېشىشىنى كۈتۈۋاتقانلىقىنى قەيت قىلدى.
يەرمەنكىنىڭ سانغا ئەمەس، سۈپەتكە ئەھمىيەت بېرىدىغانلىقلىرىنى تەكىتلىگەن ھارۇن ساراچ: «پەقەت ئورۇن تولدۇرۇشنىڭ ئورنىغا، رايوننىڭ ئېھتىياجىنى قاندۇرالايدىغان، ئۆزىنى ئىسپاتلىغان تېخنولوگىيەلەرگە ئىگە شىركەتلەرنى ئەستايىدىللىق بىلەن تاللاۋاتىمىز» دېدى.
تۇنجى نۆۋەتلىك «BAMEX» يەرمەنكىسى تەخمىنەن 150 مىليون دوللارلىق سودا مىقدارى ياراتقان ئىدى. تەشكىللىگۈچىلەر بۇ يىل كېڭەيتىلگەن خەلقئارالىق ئىشتىراك بىلەن بۇ رەقەمنىڭ 500 مىليون دوللارغا يېتىشىنى مۆلچەرلىمەكتە.
ھەقىقىي ئېھتىياجلارنى ئەمەلىي ھەل قىلىش چارىلىرى بىلەن بىرلەشتۈرۈش
ھارۇن ساراچنىڭ ئېيتىشىچە، بۇ پائالىيەت ئەنئەنىۋى سودا يەرمەنكىلىرىنىڭ دائىرىسىدىن ھالقىپ كەتكەن. ھەيئەتلەر بىۋاسىتە ئىشلەپچىقارغۇچىلار بىلەن كۆرۈشۈش ئارقىلىق، ساھېل رايونىنىڭ خەۋپسىزلىك مەسىلىلىرىگە مۇناسىۋەتلىك تېخنولوگىيەلەرنى نەق مەيداندا كۆرۈش پۇرسىتىگە ئېرىشەلەيدۇ.
ئۆتكەن يىللىق قاتناشقۇچىلارنىڭ ئىنكاسلىرىنىڭ ئىنتايىن ياخشى بولغانلىقىنى بىلدۈرگەن ساراچ، «BAMEX 2026» يەرمەنكىسىگە بولغان ئېھتىياجنىڭ ھازىردىن باشلاپلا ئاشقانلىقىنى ۋە نۇرغۇن دۆلەتلەرنىڭ ۋەكىل ئەۋەتىشنى خالايدىغانلىقىنى ئېيتتى.
كەلگۈسىگە نەزەر سالغاندا، «BAMEX» يەرمەنكىسىنى ئىككى يىلدا بىر قېتىم ئۆتكۈزۈش پىلانلانغان بولۇپ، ئۇنىڭ ئۇزۇن مۇددەتلىك، پۈتۈن رايون خاراكتېرلىك بىر مۇداپىئە سۇپىسىغا ئايلىنىشى نىشان قىلىنماقتا.
ھارۇن ساراچ سۆزىنىڭ ئاخىرىدا: «ئافرىقادا ۋە دۇنيا مىقياسىدا نۆۋەتتىكى خەۋپسىزلىك ۋە گېوسىياسىي ۋەزىيەتنى كۆزدە تۇتقاندا، BAMEX پەقەت بىر يەرمەنكىدىنلا ئىبارەت ئەمەس. ئۇ ھەقىقىي ئېھتىياجلار بىلەن ئۈنۈملۈك ھەل قىلىش چارىلىرى ئۇچراشقان، يۇقىرى دەرىجىلىك ھەيئەتلەر مەھسۇلاتلارنى نەق مەيداندا باھالىيالايدىغان بىر ساھەدۇر. نىشانىمىز BAMEX نى دۇنيادىكى ئەڭ ئۆزگىچە، ئۈنۈملۈك ۋە سودا جەھەتتىن ئەڭ مۇۋەپپەقىيەتلىك مۇداپىئە سۇپىلىرىنىڭ بىرىگە ئايلاندۇرۇشتۇر» دېدى.
