تۈركىيە رادىيو-تېلېزىيە ئىدارىسى- ت ر ت (TRT) ئالاقە ھەمكارلاشقۇچىسى بولغان ۋە بۇ يىل 21-مايدىن 24-مايغىچە ئۆتكۈزۈلىدىغان بايرامنىڭ ئېچىلىشى، ئىستانبۇل ئاتاتۈرك ئايرودۇرۇمىدا قۇرۇلغان «خان چېدىرى» ئالدىدا ئوقۇغۇچىلارنىڭ «گۈلبانگ» ئەنئەنىسىگە ئەگىشىپ كۆرسەتكەن نومۇرلىرى بىلەن ئىشقا ئاشۇرۇلدى. ئۇنىڭدىن كېيىن ئىستانبۇل تارىخىي تۈرك مۇزىكا ئۆمىكىنىڭ «مەھتەران» ئەترىتى سەھنىگە چىقتى.
ئېچىلىش مۇراسىمىدا سۆز قىلغان دۇنيا ئېتنو-تەنھەرىكەت كۆنفېدېراتسىيەسىنىڭ رەئىسى بىلال ئەردوغان، بايرام داۋامىدا مەدەنىيەت بايلىقلىرىنىڭ ھەممەيلەن بىلەن بىرلىكتە ياشىتىلىدىغانلىقىنى ئېيتتى.
زىيارەتچىلەرگە سالام بەرگەن ئەردوغان، بايرام داۋامىدا چېلىشىش ۋە ئاتلىق تەنھەرىكەت تۈرلىرىنى ئۆز ئىچىگە ئالغان تۈرلۈك پائالىيەتلەرنىڭ ئۆتكۈزۈلىدىغانلىقىنى قەيت قىلدى.
ئۇ يەنە، بايرام دائىرىسىدە ئۆتكۈزۈلىدىغان پائالىيەتلەردە بالىلار ۋە ئائىلىلەرنىڭ ئەنئەنىۋى مەدەنىيەت بىلەن ئۇچرىشىدىغانلىقىنى تەكىتلەپ مۇنداق دېدى:
«بۇ يىل يەنە بۇ يەردە ئۇدا 4 كۈن مەدەنىيىتىمىزنىڭ بايلىقلىرىنى بىرلىكتە ھېس قىلىمىز. بالىلىرىمىز، چوڭلىرىمىز بىلەن ئائىلە بويىچە بىرلىكتە ئەنئەنىنىڭ پۇرىقى ۋە ھاۋاسىدىن بەھرىمەن بولىمىز ھەمدە دۇنيانىڭ ھەرقايسى جايلىرىدىن كەلگەن مېھمان سەنئەتكارلار، تەنھەرىكەتچىلەر ۋە مەدەنىيەت ئەھلىلىرىنى بۇ يەردە بىرلىكتە كۈتۈۋالىمىز. بۈگۈن بۇ يەرگە كەلگەن بالىلار مەدەنىيەت بايلىقىنىڭ نەقەدەر قىممەتلىك ۋە ئەھمىيەتلىك ئىكەنلىكىنى ھېس قىلىدۇ، تەسىرلىنىدۇ.»
ئىستانبۇلنىڭ خەلقئارالىق ئەھمىيىتىنىڭ ناھايىتى مۇھىملىقىنى تەكىتلەپ ئۆتكەن بىلال ئەردوغان، سۆزىدىن كېيىن بالىلار بىلەن بىرلىكتە لېنتا كېسىپ، بايرامنىڭ ئېچىلىشىنى ئىشقا كىرىشتۈردى.
