سۈرىيە نېفىت شىركىتىنىڭ باياناتىدا، جەبسە تەبىئىي گاز ئەسلىھەسىدىن گاز يەتكۈزىدىغان تۇرۇبا لىنىيەسىدە تۈنۈگۈن تاڭ سەھەردە پارتلاش يۈز بەرگەنلىكى بىلدۈرۈلدى.
پارتلاش سەۋەبىدىن تۇرۇبا لىنىيەسىدىكى گاز ئېقىمى توختىغان. ۋەقەدىن كېيىن قۇدۇقلار ئايرىۋېتىلىپ، بىخەتەرلىك كىلاپانلىرى تاقالغان ۋە رايون بىخەتەرلىك كونتروللۇقىغا ئېلىنغان.
تېخنىكا خادىملىرى ۋەقە يۈز بەرگەن ھامان رېمونت خىزمىتىنى باشلىغان بولۇپ، خىزمەت 24 سائەتلىك نۆۋەتلىشىپ ئىشلەش تۈزۈمىدە داۋاملاشماقتا.
باياناتتا، گاز ئېقىمىنىڭ توختىشى بەزى توك ئىشلەپچىقىرىش تۇربىنىلىرىنىڭ يېقىلغۇ بىلەن تەمىنلىنىشىگە تەسىر كۆرسەتكەنلىكى، پەيدا بولغان كەمچىلىكنى ھازىرقى زاپاس ۋاسىتىلەر بىلەن تولدۇرۇش ئۈچۈن سۈرىيە ئېلېكتىر شىركىتى بىلەن ماسلىشىپ ئېلىپ بېرىلىۋاتقانلىقى بىلدۈرۈلدى.
ۋەقەدە خىزمەتچىلەردىن يارىلانغانلار يوق. تۇرۇبا لىنىيەسى قايتىدىن ئىشقا كىرىشتۈرۈلگۈچە رېمونت خىزمىتىنىڭ داۋاملىشىدىغانلىقى قەيت قىلىندى.
شىركەتنىڭ بىلدۈرۈشىچە، دەسلەپكى تەكشۈرۈش نەتىجىسى پارتلاشنىڭ بۇزغۇنچىلىق ھەرىكىتىدىن كېلىپ چىققان بولۇشى مۇمكىنلىكىنى كۆرسەتكەن. ۋەقە ھەققىدىكى تەكشۈرۈش مۇناسىۋەتلىك ئورگانلار بىلەن ماسلىشىپ داۋاملاشتۇرۇلۇۋاتقان بولۇپ، جاۋابكارلارنى تۇتۇش ئۈچۈنمۇ خىزمەتلەر ئىشلەنمەكتە.
