ئامېرىكا پرېزىدېنتى دونالد ترامپ مۇزاكىرىلەر مەسىلىسىدە ئىرانغا ئىشەنمەيدىغانلىقىنى بىلدۈرۈپ: «ئىرانغا ئىشىنىدىغان ئەڭ ئاخىرقى كىشى مەن. ئۇلار ماڭا ئىزچىل يالغان سۆزلىدى» دېدى.
دونالد ترامپ ئوخايودىن ۋاشىنگتونغا قايتىش يولىدا مۇخبىرلارنىڭ كۈنتەرتىپكە مۇناسىۋەتلىك سۇئاللىرىغا جاۋاب بەردى.
ترامپ ئىراننىڭ مۇزاكىرىلەر بويىچە كۆپ قېتىم «يالغان سۆزلىگەنلىكىنى» ئىلگىرى سۈرۈپ، بۇ مۇساپىدە تېھرانغا ئىشەنمەيدىغانلىقىنى ئوتتۇرىغا قويدى.
ئامېرىكا پرېزىدېنتى: «ئىرانغا ئىشەنمەيمەن. نېمىشقا خۇددى ئىرانغا ئىشىنىدىغاندەك گەپ قىلىسىلەر؟ ئىرانغا ئىشىنىدىغان ئەڭ ئاخىرقى كىشى مەن. ئۇلار ماڭا ئىزچىل يالغان سۆزلىدى» دېدى.
ھۆرمۈز بوغۇزىنىڭ پۈتۈنلەي ئامېرىكا دېڭىز ئارمىيەسى تەرىپىدىن تىزگىنلىنىۋاتقانلىقىنى ئىلگىرى سۈرگەن ترامپ: «ھازىرچە ھۆرمۈز بوغۇزى ئۈستىدە تولۇق تىزگىنلەش ئىقتىدارىغا ئىگەمىز. كونتىروللۇق ئۇلاردا ئەمەس، تولۇق كونتىروللۇق بىزدە. ئۇ يەر بىزنىڭ» دېدى.
«ئۇلار باشقا بىر ئايروپىلاندا كېتىشىمنى تەلەپ قىلدى»
يەنە بىر تەرەپتىن ترامپ ئۆتكەن ئايدا ناتو ئالىي دەرىجىلىك ئۇچرىشىشىدىن كېيىن تۈركىيەدىن ئايرىلىۋاتقاندا مەخپىي مۇلازىمەت ئىدارىسىنىڭ «بىخەتەرلىك ئەندىشىلىرىنى» سەۋەب كۆرسىتىپ ئۆزىنى باشقا بىر ئايروپىلان ئىشلىتىشكە يۈزلەندۈرگەنلىكىنى جەزملەشتۈردى.
ترامپ مەسىلىگە مۇناسىۋەتلىك بىر سۇئالغا: «بۇ پۈتۈنلەي يوشۇرۇن خىزمەت ئىدارىسىغا باغلىق. مەن پەقەت ئۇلار نېمە دېسە شۇنىڭغا ئاساسلىنىمەن. شۇڭلاشقا مەخپىي مۇلازىمەت ئىدارىسى ۋە ئارمىيەنىڭ يېتەكچىلىكىگە ماسلاشتىم. ئۇلار مەندىن باشقا بىر ئايروپىلاندا كېتىشىمنى تەلەپ قىلدى، ئۇمۇ بىخەتەرلىك نۇقتىسىدىن ئوخشاش بىر تاللاش ئىدى» دەپ جاۋاب بەردى.
ئۆزىگە ناھايىتى كۆپ جايلاردىن ئوخشىمىغان تەھدىتلەرنىڭ بارلىقىنى ئىپادىلىگەن ترامپ: «بۇنى قىلىشىمنى تەلەپ قىلدى، مەنمۇ قىلدىم. ئۇلار نېمە دېسە شۇنى قىلىمەن. ئويلايمەنكى بىر تەھدىت بار ئىدى. بۇ مەسىلىدە كۆپ سۇئال سورىمىدىم. ناھايىتى كۆپ تەھدىت ئالىمەن» دېدى.
