نىگېرىيە ئۇزۇندىن بۇيان دۆلەتنىڭ ھەرقايسى جايلىرىدا بوكو ھارام (Boko Haram) ئاشقۇن گۇرۇھى ۋە دائېشقا قاراشلىق ئىسۋاپ (ISWAP) نى ئۆز ئىچىگە ئالغان قوراللىق گۇرۇپپىلارنىڭ ھۇجۇمىغا تاقابىل تۇرۇش ئۈچۈن كۈرەش قىلىپ كەلمەكتە.

ئامېرىكا پىرېزىدېنتى دونالد ترامپ جۈمە (2026-يىلى 15-ماي) كۈنى كېچىدە ئېلان قىلغان باياناتىدا، ئامېرىكا بىلەن نىگېرىيەنىڭ بىرلىكتە ئېلىپ بارغان ھەربىي ھەرىكىتىدە، دائېشنىڭ دۇنيا مىقياسىدىكى ئىككىنچى نومۇرلۇق كاتتىبېشىنىڭ ئۆلتۈرۈلگەنلىكىنى جاكارلىدى.

ترامپ ئۆزىنىڭ «ھەقىقىي مېديا» (Truth Social) سۇپىسىدا مۇنداق يازدى: «بۈگۈن كېچە، مېنىڭ بۇيرۇقۇم بىلەن، شىر يۈرەك ئامېرىكا قىسىملىرى ۋە نىگېرىيە قوراللىق قىسىملىرى دۇنيادىكى ئەڭ ئاشقۇن تېررورچىنى يوقىتىش ئۈچۈن ئىنچىكىلىك بىلەن پىلانلانغان ۋە ئىنتايىن مۇرەككەپ بىر ۋەزىپىنى كەم-كۈتسىز ئورۇنداپ چىقتى.»

ترامپنىڭ ئېيتىشىچە، ئەبۇ بىلال ئەل مىنۇكى (Abu-Bilal al-Minuki) «ئافرىقادا يوشۇرۇنالايمەن دەپ ئويلىغان»، ئەمما ئامېرىكا ئىستىخبارات مەنبەلىرى ئۇنىڭ ھەرىكىتىنى ئىز قوغلاپ تۇرغان.

ئۇ: «ئەبۇ بىلال ئەل مىنۇكى ئەمدى ئافرىقا خەلقىنى ۋەھىمىگە سالالمايدۇ ياكى ئامېرىكالىقلارنى نىشان قىلغان ھەرىكەتلەرنى پىلانلاشقا ياردەم قىلالمايدۇ» دېدى ۋە ئەبۇ بىلال ئەل مىنۇكى يوقىتىلغاندىن كېيىن دائېشنىڭ دۇنياۋى ھەرىكەتلىرىنىڭ «كۆرۈنەرلىك ئازىيىدىغانلىقى» نى ئەسكەرتتى.

ئۇ نىگېرىيە ھۆكۈمىتىگە بۇ ھەرىكەتتىكى ھەمكارلىقى ئۈچۈن رەھمەت ئېيتتى.

نىگېرىيە ئۇزۇندىن بۇيان دۆلەتنىڭ ھەرقايسى جايلىرىدا بوكو ھارام تېررورلۇق تەشكىلاتى ۋە دائېشقا قاراشلىق «ئىسۋاپ» نى ئۆز ئىچىگە ئالغان قوراللىق گۇرۇپپىلارنىڭ ھۇجۇمى سەۋەبىدىن قىيىن ئەھۋالدا ئىدى.

نىگېرىيە ھۆكۈمىتى بۇ تەھدىتكە تاقابىل تۇرۇش ئۈچۈن ئەسكەر ئەۋەتىش ۋە خەلقئارالىق شېرىكلەر بىلەن ھەمكارلىشىش قاتارلىق تەدبىرلەرنى قوللاندى.

2-ئايدا، قوراللىق گۇرۇپپىلارنىڭ ھۇجۇمى كەسكىنلىشىۋاتقان بىر پەيتتە، ئامېرىكا نىگېرىيەنىڭ شىمالىغا تەخمىنەن 100 نەپەر ھەربىي خادىم ئەۋەتىپ، يەرلىك قىسىملارنى تەربىيەلەش، ئاخبارات توپلاش ۋە باشقا تېخنىكىلىق جەھەتتە قوللىغان ئىدى.

مۇناسىۋەتلىك ئۇچۇرلارTRT World - Nigerian forces neutralise Daesh-affiliated terrorists in Borno state