ئىران تاشقى ئىشلار مىنىستىرى ئابباس ئاراقچى ئامېرىكا پىرېزىدېنتى دونالد ترامپنىڭ دۆلىتىگە قاراتقان «ئىقتىسادىي D-Day ھەرىكىتى» نى ۋاشىنگتوننىڭ بارغانسېرىئېشىپ بېرىۋاتقان قەرزلىرى ۋە ئۆسۈم تەننەرخىدىن كېلىپ چىققان ئىقتىسادىي كىرىزىسىنى يوشۇرۇشقا ئۇرۇنۇش، دەپ ئەيىبلىدى. ئاراقچى ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، بۇ ھەرىكەتنى ئامېرىكانىڭ «مىسلى كۆرۈلمىگەن قەرز ۋە بارغانسېرى ئېشىپ بېرىۋاتقان ئۆسۈم يۈكىدىن كېلىپ چىققان ئۆزىنىڭ كىرىزىسىدىن دىققەتنى بۇرۇۋېتىش» تىرىشچانلىقى دەپ سۈپەتلىدى.
ئاراقچى ئامېرىكانىڭ مەغلۇبىيەتكە ئۇچرىغان سىياسەتلىرىنى داۋاملاشتۇرۇشىنىڭ ۋاشىنگتونغا «تېخىمۇ كۆپ مەغلۇبىيەت» ئېلىپ كېلىدىغانلىقىنى، شۇنداقلا بۇ ئەھۋالنىڭ ئىران خەلقىنىڭ ئامېرىكاغا بولغان ئۆچمەنلىكىنى تېخىمۇ ئاشۇرىدىغانلىقىنى بايان قىلىپ مۇنداق دېدى:
«ئامېرىكانىڭ ئىقتىسادىي تېررورلۇقى دۇنيا ئىقتىسادىنى ۋە دۇنيانىڭ ھەرقايسى جايلىرىدىكى ئىگىلىك ھوقۇقىنى تەھدىتكە ئۇچراتماقتا.»
ئامېرىكا پىرېزىدېنتى ترامپ ئىرانغا قارشى «ھەرقانداق بىر دۆلەتكە قوللىنىلغان ئەڭ كەڭ كۆلەملىك ئىقتىسادىي ھەرىكەت» نى باشلايدىغانلىقىنى، ئىران بىلەن ئىقتىسادىي مۇناسىۋىتىنى داۋاملاشتۇرغان دۆلەتلەرنىڭمۇ ئېغىر ئىقتىسادىي بەدەل تۆلەيدىغانلىقىنى ئۇقتۇرغان ئىدى.
