كۇبا تاشقى ئىشلار مىنىستىرى برۇنو رودرىگۇئېز ئامېرىكا قوشما ئىشتاتلىرىنىڭ كۇباغا قاراتقان يېڭى ئېمبارگولىرىنىڭ خەلقنىڭ ئاساسىي مۇلازىمەتلەردىن بەھرىمەن بولۇشىغا توسالغۇ بولۇۋاتقانلىقىنى بىلدۈردى.
رودرىگۇئېز ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا، ئامېرىكانىڭ كۇبادىكى كانچىلىق، تاشقى سودا ۋە مېتاللورگىيە ساھەلىرىنى نىشان قىلغان ئېمبارگولىرىغا نارازىلىق بىلدۈردى.
ئامېرىكا تاشقى ئىشلار مىنىستىرى ماركو رۇبىيونى كۇبا ھۆكۈمىتىنىڭ «خەلققە ئاساسىي مۇلازىمەتلەرنى تەمىنلىشىنى توسۇش مەقسىتىدە ھەرىكەت قىلىش» بىلەن ئەيىبلىگەن رودرىگۇئېز مۇنداق دېدى: «بۇ ئېمبارگولار، بولۇپمۇ كۇبادىكى خۇسۇسىي كىچىك ۋە ئوتتۇرا تىپتىكى كارخانىلار تەرىپىدىن تەمىنلىنىدىغان يېمەك-ئىچمەك، دورا-دەرمەك ۋە تېببىي ئۈسكۈنىلەر قاچىلانغان كونتېينېرلارنىڭ توشۇلۇشىغا توسالغۇ بولماقتا».
برۇنو رودرىگۇئېز مەزكۇر ئېمبارگولارنى كۇباغا قارىتىلغان «مۇۋەپپەقىيەتسىز بىر ئادەت» دەپ سۈپەتلەپ، كۇبا خەلقلەر دوستلۇق ئىنستىتۇتىنىڭ ئۇدا 60 يىلدىن ئارتۇق ۋاقىتتىن بۇيان خەلقئارالىق ھەمكارلىق، ئادالەت ۋە تىنچلىقنى ئىلگىرى سۈرۈپ كېلىۋاتقانلىقىنى، بۇنىڭ ئامېرىكا تاشقى ئىشلار مىنىستىرىنىڭ چىرىك سىياسىتىگە پۈتۈنلەي زىتى ئىكەنلىكىنى تەكىتلىدى.
ئامېرىكا كۇباغا قارىتا سىياسىي ۋە ئىقتىسادىي ئۆزگىرىش ھاسىل قىلىش مەقسىتىدە يۈرگۈزۈۋاتقان بېسىم سىياسىتى دائىرىسىدە، تۈنۈگۈن كانچىلىق، تاشقى سودا ۋە مېتاللورگىيە ساھەلىرى بىلەن چېتىشلىقى بار كىشىلەر ھەمدە قۇرۇلۇش مىنىستىرلىقىنى ئۆز ئىچىگە ئالغان 9 دۆلەت ئورگىنىنى ئېمبارگو تىزىملىكىگە كىرگۈزگەن ئىدى.
