تۈركىيەنىڭ ئەرمېنىيە بىلەن مۇناسىۋەتلەرنى نورماللاشتۇرۇش مۇساپىسى ئالاھىدە ۋەكىلى، ئاخىلكەلەك-قارىس تۆمۈريول لىنىيەسىنىڭ ئەرمېنىيەنىڭ ئىمپورت-ئېكسپورتىغا ئېچىلىشىنىڭ ئىككى قوشنا دۆلەت ئوتتۇرىسىدىكى سودا مۇناسىۋەتلىرىدە يېڭى بىر قەدەم بولىدىغانلىقىنى ئېيتتى.
تۈركىيەنىڭ ئەرمېنىيە بىلەن مۇناسىۋەتلەرنى نورماللاشتۇرۇش مۇساپىسى ئالاھىدە ۋەكىلى سەردار قىلىچ يەكشەنبە كۈنى X تىكى ھەمبەھىرلىگەن ئۇچۇرىدا، ئەرمېنىيە باش مىنىستىرى نىكول پاشىنياننىڭ تۆمۈريول لىنىيەسىنىڭ ئەرمېنىيەنىڭ تاشقى سودىسىغا ئېچىلىدىغانلىقىغا دائىر بۇرۇنقى باياناتى ئۈستىدە توختالدى.
قىلىچ بۇ تەرەققىياتنى تۈركىيە-ئەرمېنىيە ئوتتۇرىسىكى مۇناسىۋەتلەرنى نورماللاشتۇرۇش مۇساپىسى دائىرىسىدە بىۋاسىتە سودىدىكى يېڭى بىر قەدەم دەپ باھالىدى.
قىلىچ: «تۈركىيە، ئەرمېنىيە، ئەزەربەيجان ۋە گىروزىيە ئوتتۇرىسىدا تۆت تەرەپلىك ھەمكارلىقنىمۇ تەرەققىي قىلدۇرىدىغان، رايونلۇق تىنچلىق ۋە مۇقىملىققا مۇھىم تۆھپە قوشىدىغان بۇ يېڭى قەدەمنىڭ بارلىق دۆلەتلەر ئۈچۈن خەيرلىك بولۇشىنى تىلەيمەن» دېدى.
ئەرمېنىيە باش مىنىستىرى بۇ قەدەمنى ئەرمېنىيە ئىقتىسادى ئۈچۈن مۇھىم بىر تەرەققىيات دەپ باھالىدى ھەمدە تۈركىيە بىلەن گىروزىيەدىكى شېرىكلىرىگە ھەمكارلىقلىرى ئۈچۈن رەھمەت ئېيتتى.
پاشىنيان ئەرمېنىيەنىڭ ئەمدى گىروزىيە ۋە ئەزەربەيجان ئارقىلىق رۇسىيەگە، رۇسىيە ۋە قازاقىستان ئارقىلىق خىتايغا تۆمۈريول قاتنىشى لىنىيەسىگە ئېرىشكەنلىكىنى سۆزىگە ئىلاۋە قىلدى.
پاشىنيان تۈركىيە ۋە گىروزىيە ئارقىلىق ئۆتىدىغان تۆمۈريول يۆنىلىشىنىڭ ئەرمېنىيەنىڭ ياۋروپا ئىتتىپاقى بىلەن بولغان ئالاقىسىنى كۈچلەندۈرىدىغانلىقىنى، تۈركىيە، ئەزەربەيجان ۋە ئىران بىلەن بولغان تۆمۈريول ئالاقىلىرىنىڭمۇ يېقىن كەلگۈسىدە قۇرۇلۇشىنىڭ كۈتۈلۈۋاتقانلىقىنى ئېيتتى.
