تۈركىيە مىللىي پۇتبول كوماندىسى، 2026-يىللىق دۇنيا لوڭقىسى پۇتبول مۇسابىقىسىنىڭ D گۇرۇپپىسىدىكى ئەڭ ئاخىرقى مۇسابىقىسىدە ئامېرىكا كوماندىسىنى لوس ئانژېلېس تەنتەربىيە مەيدانىدا 2 گە قارشى 3 نەتىجە بىلەن يېڭىپ، مۇسابىقىگە غەلىبە بىلەن خاتىمە بەردى.
مۇسابىقىنى تېز سۈرئەتتە باشلىغان تەرەپ ئامېرىكا قوشما ئىشتاتلىرى بولۇپ، ئاۋستون ترۇستى 3-مىنۇتتا توپنى ئۇغۇرجان چاقىرنىڭ يېنىدىن ئۆتكۈزۈپ تورغا كىرگۈزۈپ، كوماندىسىنى 0 گە قارشى 1 نەتىجە بىلەن ئالدىغا ئۆتكۈزدى.
تۈركىيە كوماندىسى ئارىدىن ئۇزۇن ئۆتمەيلا نەتىجىنى تەڭلەشتۈردى. بارىش ئالپەر يىلماز ئامېرىكا قوشما ئىشتاتلىرى مۇداپىئە لىنىيەسىدىن بوشلۇق تېپىپ، توپنى Real Madrid كوماندىسى ماھىرى ئاردا گۈلەرنىڭ ئالدىغا تاشلاپ بەردى؛ 10-مىنۇتتا كۈچلۈك زەربە بىلەن توپنى تورغا كىرگۈزگەن ئاردا، ھەم ئۆزىنىڭ ھەم كوماندىسىنىڭ دۇنيا لوڭقىسىدىكى تۇنجى توپىنى كىرگۈزدى.
ئاردا كىرگۈزگەن بۇ توپ تۈركىيەنىڭ مەزكۇر مۇسابىقىدىكى 63-قېتىملىق توپقا زەربە بېرىشى ھېسابلىنىدۇ، شۇنداقلا تۈركىيەنىڭ 2002-يىلى ئىلھان مەنسىز كىرگۈزگەن توپتىن كېيىن (يەنى ئارىدىن 24 يىل ئۆتكەندىن كېيىن)، دۇنيا لوڭقىسى پۇتبول مۇسابىقىسىدە كىرگۈزگەن تۇنجى توپى بولۇپ قالدى.
مۇسابىقىنىڭ بىرىنچى مەيدانى ئۆزئارا ھۇجۇم قىلىش بىلەن داۋاملىشىۋاتقان پەيتتە، تۈركىيە كوماندىسى جازا رايونىدا توپ بىلەن ئۇچراشقان ئوركۇن كۆكچۈنىڭ 31-مىنۇتتا كىرگۈزگەن توپى بىلەن قايتىدىن ئالدىغا ئۆتتى.
يېقىن ئارىلىقتىن زەربە بېرىش
مۇسابىقىنىڭ ئىككىنچى مەيدانىنى قايتىدىن كۈچلىنىپ باشلىغان ئامېرىكا كوماندىسى، 49-مىنۇتتا تۈركىيە كوماندىسىنىڭ جازا رايونىغا كەلگەن توپنى تولۇق يىراقلاشتۇرالماسلىقى نەتىجىسىدە نەتىجىنى قايتىدىن تەڭلەشتۈردى؛ سېباستىيان بېرخالتېر توپقا يېتىشىپ بېرىپ يېقىن بىر نۇقتىدىن كۈچلۈك زەربە بېرىپ توپنى تورغا كىرگۈزدى. بۇ ئۇنىڭ كوماندىسىدىكى تۇنجى توپى ھېسابلىنىدۇ.
تۈركىيە كوماندىسى 90+8-مىنۇتتا قائان ئايخاننىڭ يېقىن ئارىلىقتىن بەرگەن زەربىسى بىلەن مۇسابىقىدە 2 گە قارشى 3 نەتىجە بىلەن غەلىبە قىلىپ، مۇسابىقە جەريانىدىكى تۇنجى ۋە بىردىنبىر غەلىبىسىنى قولغا كەلتۈردى.
تۈركىيە كوماندىسىنىڭ تىرېنېرى ۋىنسېنزو مونتېللا، بۇ غەلىبىدىن كېيىن كوماندىسى بىلەن پەخىرلىنىدىغانلىقىنى ۋە دۆلىتىگە باشلىرىنى تىك تۇتقان ھالدا قايتىدىغانلىقىنى بىلدۈردى.
مونتېللا مۇسابىقىدىن شاللىنىپ كەتكەن بولۇشنىڭ ئېلىپ كەلگەن روھىي بېسىمىغا ۋە ئامېرىكا مەستانىلىرى ئالدىدا ئوينىغانلىقىغا قارىماي، توپچىلارنىڭ قابىلىيىتىنى، كۈچىنى ۋە خاراكتېرىنى نامايان قىلغانلىقىنى سۆزلىرىگە ئىلاۋە قىلدى.
گۇرۇپپىدىكى يەنە بىر مۇسابىقىدە ئاۋسترالىيە بىلەن پاراگۋاي 0 گە قارشى 0 نەتىجە بىلەن تەڭلىشىپ قالدى.
بۇ نەتىجىلەردىن كېيىن ئامېرىكا كوماندىسى D گۇرۇپپىسىنى بىرىنچى بولۇپ تاماملاپ يۇقىرى بىر دەرىجىگە ئۆرلەشكە مۇۋەپپەق بولدى، تۈركىيە كوماندىسى بولسا غەلىبە قىلغان بولسىمۇ ئەڭ ئاخىرقى ئورۇندا قېلىپ مۇسابىقە بىلەن خوشلاشتى.
ئامېرىكا كوماندىسى ئالدىنقى 32 كۈچلۈك كوماندا ئارىسىدىكى مۇسابىقىدە بوسنىيە – گېرتسېگوۋىنا كوماندىسى بىلەن جەڭگە چۈشىدۇ.
