«New York Times» گېزىتىنىڭ بىر خەۋىرىگە قارىغاندا، ئىسرائىلىيە ئىرانغا قارشى ھەرىكەتلىرىنى قوللاش ئۈچۈن ئىراقنىڭ غەربىي قىسمىدىكى چۆللۈكتە ئىككى مەخپىي ھەربىي بازا قۇرغان.
گېزىت، ئىراقلىق ۋە رايونلۇق ئەمەلدارلارنىڭ سۆزىنى نەقىل كەلتۈرۈپ، يېڭىدىن ئاشكارىلانغان بۇ بازىنىڭ، ئىسرائىلىيەنىڭ بىر يىلدىن ئارتۇق ۋاقىتتىن بۇيان ئىراق تەۋەلىكىدە خاتىرجەم ئىشلىتىپ كېلىۋاتقان ئىككى مەخپىي ئورۇننىڭ بىرى ئىكەنلىكىنى بىلدۈردى.
ئەمەلدارلارنىڭ ئېيتىشىچە، بۇ بازىلار ئاساسلىقى ھاۋا ئارمىيەسىنى قوللاش، يېقىلغۇ تولدۇرۇش ۋە داۋالاش مۇلازىمەتلىرى ئۈچۈن ئىشلىتىلگەن بولۇپ، ئۇ يەنە 2025-يىلى ئىيۇن ئېيىدا ئىرانغا قارشى ئېلىپ بېرىلغان 12 كۈنلۈك ئۇرۇشتا مۇھىم رول ئوينىغان.
بۇ ئورۇنلارنىڭ بىرى، ئىراقلىق پادىچى ئاۋاد ئەششەممارى مارت ئېيىدا ئەننۇكەيب ئەتراپىدا نورمالسىز ھەربىي پائالىيەتلەرنى بايقىغاندىن كېيىن ئاشكارىلانغان.
ئەششەممارى تىك ئۇچارلار، چېدىرلار ۋە ۋاقىتلىق ئايروپىلان قونۇش يولىغا ئوخشايدىغان بىر جاينى كۆرگەندىن كېيىن، يەرلىك ئەمەلدارلارغا خەۋەر بەرگەن.
دوكلاتتا، ئەششەممارىنىڭ كېيىنچە ئۆلۈك ھالەتتە تېپىلغانلىقى، رايوننى تەكشۈرۈش ئۈچۈن ئەۋەتىلگەن ئىراق قىسىملىرىنىڭمۇ ئوققا تۇتۇلغانلىقى، نەتىجىدە بىر ئەسكەرنىڭ قازا قىلىپ، ئىككى ئەسكەرنىڭ يارىلانغانلىقى بىلدۈرۈلدى.
«Wall Street Journal» بۇ ئاينىڭ بېشىدا ئىسرائىلىيەنىڭ رايوندا مەخپىي بىر ھەربىي بازا قۇرغانلىقىنى خەۋەر قىلغانىدى.
ئىراقنىڭ بىر يۇقىرى دەرىجىلىك بىخەتەرلىك ئەمەلدارى «ئانادولۇ ئاگېنتلىقى» غا بەرگەن باياناتىدا، ئىراقنىڭ غەربىدىكى بىر چۆللۈكتە ئىسرائىلىيەنىڭ ھەربىي پائالىيەت ئېلىپ بېرىۋاتقانلىقى توغرىسىدىكى دەۋالارنى «يالغان» دېدى.
ئەمما مەزكۇر ئەمەلدار، ئىراق قىسىملىرىنىڭ مارت ئېيىدا ئەننۇكەيب چۆللۈكىدە «سىرلىق» بىر ھاۋادىن قونۇش ھەرىكىتىگە دۇچ كەلگەنلىكىنى ۋە شۇ مەزگىلدە بۇ ۋەقەگە مۇناسىۋەتلىك زۆرۈر تەدبىرلەرنىڭ قوللىنىلغانلىقىنى بىلدۈردى.
