«يىپەك يولىدىكى يېڭى پۇرسەتلەر، ياۋروپا-ئاسىيا ھەمكارلىقىدىكى يېڭى ھاياتىي كۈچ» تېمىلىق 9-نۆۋەتلىك خىتاي-ياۋروپا-ئاسىيا كۆرگەزمىسى ئۈرۈمچى شەھىرىدە باشلاندى.

تۈركىيە جۇمھۇرىيىتى سودا مىنىستىرلىقى تۈركىيەلىك قاتناشقۇچىلارنى تەشكىللەنگەن كۆرگەزمىدە، «ئەگە ئېكسپورتچىلار بىرلەشمىسى»گە ئوخشاش ساھە ئورگانلىرىدىن سىرت، «ئۈلكەر»، «كارا فىرۇن»، «مەمەت تۈركەل» ۋە «بېلىززا» قاتارلىق شىركەتلەرمۇ كۆرگەزمە سۇپىسى ئېچىپ، خىتاي ۋە ئاسىيا بازىرىدىكى يوشۇرۇن خېرىدارلارغا ئۆز مەھسۇلاتلىرىنى تونۇشتۇردى.

تۈركىيەنىڭ بېيجىڭدا تۇرۇشلۇق باش ئەلچىسى سەلچۇق ئۈنال سودا باش مەسلىھەتچىلىكى خادىملىرى بىلەن بىرلىكتە تۈركىيە شىركەتلىرىنىڭ كۆرگەزمە ئورۇنلىرىنى ئېكىسكۇرسىيە قىلدى ھەمدە ئۇلارنىڭ پائالىيەتلىرى ھەققىدە مەلۇمات ئېلىپ، شىركەتلەرگە ئۇتۇق تىلىدى.

باش ئەلچى ئۈنال كۆرگەزمە مۇناسىۋىتى بىلەن ئۈرۈمچىدە ئېلىپ بارغان زىيارىتى جەريانىدا، يەرلىك دائىرىلەر بىلەنمۇ ئۇچراشتى.

كۆرگەزمىگە 27 دۆلەت ۋە رايوندىن كەلگەن 2 مىڭدىن ئارتۇق سودا ۋەكىلى قاتناشماقتا

كۆرگەزمىنىڭ ئېچىلىش مۇراسىمى 25-ئىيۇن كۈنى ئۈرۈمچىدىكى خەلقئارا يىغىن ۋە كۆرگەزمە مەركىزىدە ئۆتكۈزۈلدى. مۇراسىمغا قازاقىستان باش مىنىستىرىنىڭ مۇئاۋىنى سېرىك جۇمانگارىن، قىرغىزىستان مىنىستىرلار كابىنېتى رەئىسى مۇئاۋىنى ئېرلىست ئاكۇنبېكوف ۋە پاكىستان پارلامېنتى مۇئاۋىن رەئىسى سەيىد غۇلام مۇستاپا شاھ قاتارلىقلار قاتناشتى ھەمدە نۇتۇق سۆزلىدى.

خىتاينىڭ مۇئاۋىن باش مىنىستىرى دىڭ شۆشياڭ مۇراسىمدا سۆز قىلىپ، خىتاي بىلەن ياۋروپا-ئاسىيا دۆلەتلىرىنى تەرەققىيات ئىستراتېگىيەلىرىنى تېخىمۇ چوڭقۇر جىپسىلاشتۇرۇشقا، يۇقىرى سەۋىيەلىك سىرتقا ئېچىۋېتىشنى كېڭەيتىشكە، شۇنداقلا تېخىمۇ ئوچۇق ۋە ئۆزئارا مەنپەئەت يەتكۈزىدىغان رايون خاراكتېرلىك ئىقتىساد-سودا مۇھىتى بەرپا قىلىش ئۈچۈن ئورتاق تىرىشىشقا چاقىردى.

بۇ يىل 25-ئىيۇندىن 29-ئىيۇنغىچە داۋاملىشىدىغان 9-نۆۋەتلىك خىتاي-ياۋروپا-ئاسىيا كۆرگەزمىسىگە 27 دۆلەت ۋە رايوندىن كەلگەن 2 مىڭدىن ئارتۇق سودا ۋەكىلى قاتناشماقتا.