تۈركىيە «A» دەرىجىلىك دۆلەتلىك ئاياللار ۋالىبول كوماندىسى 2026-يىللىق خەلقئارا ۋالىبول بىرلەشمىسى («FIVB») تەرىپىدىن ئۇيۇشتۇرۇلغان ۋالىبول «مىللەتلەر بىرلەشمىسى» («VNL») نىڭ ئىككىنچى ھەپتىسىدىكى ئۈچىنچى مەيدان مۇسابىقىسىدە، گېرمانىيە كوماندىسى بىلەن بەيگىگە چۈشۈپ  2 گە قارشى 3 نەتىجە بىلەن غەلىبە قىلدى.

مۇسابىقىنى ئىنتايىن جۇشقۇن ۋە ياخشى باشلىغان گېرمانىيە كوماندىسى، تۈركىيەنىڭ توپ كىرگۈزۈش خاتالىقلىرىدىن ئۇستىلىق بىلەن پايدىلىنىپ، تۇنجى مەيداندا 12-8 نەتىجە بىلەن ئالدىنقى ئورۇنغا ئۆتتى. مەيدان تىزگىنىنى مەھكەم ئىگىلىۋالغان گېرمانىيە ئاياللار كوماندىسى بۇ مەيداندا 25-18 نەتىجە بىلەن غەلىبە قىلىپ، 0 گە قارشى 1 نەتىجە بىلەن ئۈستۈنلۈكنى قولغا كەلتۈردى.

ئىككىنچى مەيدان ئىككى كوماندا ئوتتۇرىسىدىكى كەسكىن نومۇر تالىشىش بىلەن باشلانغان بولسىمۇ، مەلىسسا ۋارگاسنىڭ ئالاھىدە ماھارەتلىرى تۈركىيەنى 6-3 نەتىجە بىلەن ئالدىنقى ئورۇنغا ئۆتكۈزدى. دۆلەتلىك كوماندىمىز مۇستەھكەم توسۇشلىرى (بلوك) ۋە ئوتتۇرا رايون توپچىلىرىنىڭ شىددەتلىك ھۇجۇملىرى ئارقىلىق، نومۇر پەرقىنى ئالتە نومۇرغا يەنى 14-8 گە چىقاردى.

بىراق، گېرمانىيە ماھىرلىرىدىن لىنا ئالسمېيېر، كامىللا ۋېيتزېل ۋە سېكۇلايېۋلارنىڭ ئارقا-ئارقىدىن ئالغان نومۇرلىرى كوماندىنىڭ ۋەزىيىتىنى ئوڭشاپ، نومۇرنى 19-19 دە تەڭلەشتۈردى. ئىنتايىن كەسكىن رىقابەت ئىچىدە ئۆتكەن بۇ مەيداننىڭ ئاخىرقى بۆلىكىدە 26-24 نەتىجە بىلەن غەلىبە قىلغان گېرمانىيە، ئومۇمىي نەتىجىنى 0 گە قارشى 2 گە يەتكۈزدى.

تۈركىيە كوماندىسى ئۈچىنچى مەيداندا قەتئىي قارشىلىق كۆرسەتتى. ئىككى تەرەپ تەڭپۇڭ ھالەتتە باشلىغان بۇ مەيداننىڭ كېيىنكى قىسمىدا، ماھىر ئىلكىن ئايدىننىڭ ھالقىلىق نومۇرلارنى ئېلىشى بىلەن پەرقىنى ئاچقان دۆلەتلىك كوماندا، مەزكۇر مەيداندا 19 غا قارشى 25 نەتىجە بىلەن غەلىبە قىلىپ، ئومۇمىي نەتىجىنى 1 گە قارشى 2 گە ئۆزگەرتتى.

تۆتىنچى مەيدانمۇ شىددەتلىك رىقابەت ئىچىدە داۋاملاشتى. گېرمانىيە ماھىرى سېكۇلايېۋنىڭ نومۇر ئېلىشى بىلەن 14 كە قارشى 15 نومۇر بىلەن ئالدىنقى ئورۇنغا ئۆتكەن بولسىمۇ، تۈركىيە كوماندىسى رەقىبىنىڭ خاتالىقلىرىدىن چەبدەسلىك بىلەن پايدىلاندى. شۇنداقلا ۋارگاس ۋە ئىلكىن ئايدىننىڭ ماھارەتلىرى ئارقىلىق بۇ مەيداندا 22 گە قارشى 25 نەتىجە بىلەن غەلىبە قىلىپ، مۇسابىقىنى ئەڭ ھەل قىلغۇچ مەيدانغا سۆرەپ كىردى.

ئاخىرقى ھەل قىلغۇچ مەيداندا ئۈستۈنلۈكىنى ئىزچىل ساقلاپ قالغان تۈركىيە قىزلار كوماندىسى مەيدان 13 كە قارشى 15 نەتىجە بىلەن ئومۇمىي مۇسابىقىدىمۇ 2 گە قارشى 3 نەتىجە بىلەن ئاخىرقى غەلىبىنى قۇچۇپ، ئارقىدا تۇرۇپمۇ يېڭىپ چىقىشتەك قالتىس قەدەمنى مۇۋەپپەقىيەتلىك تاماملىدى.

بۇ كىشىنى ھاياجانغا سالىدىغان نەتىجە بىلەن، تۈركىيە ئاياللار كوماندىسى «VNL» مۇسابىقە پەسلىدىكى بەشىنچى قېتىملىق غەلىبىسىگە يەتكەن بولسا، گېرمانىيە كوماندىسى ئۆزىنىڭ بەشىنچى قېتىملىق مەغلۇبىيىتىنى باشتىن كەچۈردى.