سەئۇدى ئەرەبىستان باش مۇفتىسى سالىھ ئەلفەۋزان يەمەندە خەۋپسىزلىك ۋە مۇقىملىقنى قايتىدىن تۇرغۇزۇشنىڭ ئەڭ مۇھىم ۋەزىپىلەرنىڭ بىرى ئىكەنلىكىگە دىققەت تارتىپ، ئارمىيە خادىملىرىنى ھۇسىيلارغا قارشى جېنى بىلەن كۈرەش قىلىشقا تەييار تۇرۇشقا چاقىردى.
سەئۇدى ئەرەبىستان رەسمىي خەۋەر ئاگېنتلىقى SPA نىڭ خەۋىرىگە قارىغاندا، باش مۇفتى فەۋزان سەئۇدى ئەرەبىستان رەھبەرلىكىدىكى ئەرەب ئىتتىپاقداش كۈچلىرىنى ۋە سەئۇدى ئەرەبىستان ئارمىيە خادىملىرىنى بىرلىك ئىچىدە ۋەزىپىلىرىنى ئورۇنداشقا رىغبەتلەندۈرگەن.
يەمەندە خەۋپسىزلىك ۋە مۇقىملىقنى قايتىدىن تۇرغۇزۇشنىڭ ئەڭ زۆرۈر ۋەزىپە ئىكەنلىكىنى ئەسكەرتكەن فەۋزان، ئىتتىپاقداش كۈچلىرىنى سەپلىرىنى زىچ تۇتۇشقا چاقىرىپ مۇنداق دېگەن:
«شۇنى بىلىڭلاركى، سىلەر دۆلەتتە پىتنىخورلۇق تارقاتقان، خەلقنى پارچىلىغان، رەھبەرلىرىگە ئىسيان كۆتۈرگەن ۋە مۇسۇلمانلارنىڭ مۇقەددەس جايلىرىغا زىيان يەتكۈزۈشكە ئۇرۇنغان بىر دۈشمەن بىلەن ئۇرۇش قىلىۋاتىسىلەر.»
سەئۇدى ئەرەبىستان ئارمىيە خادىملىرىنى سەۋرچانلىق بىلەن ۋەزىپە ئۆتەشكە چاقىرغان فەۋزان: «سىلەر ھەر ۋاقىت ۋەزىپە ئۆتەشكە، باشلىقلىرىڭلار ۋە مەيدان قوماندانلىرىڭلارنىڭ سۆزىگە قۇلاق سېلىشقا ھەمدە بۇيرۇقلارنى ئەڭ يۇقىرى سەزگۈرلۈك بىلەن ئىجرا قىلىشقا تەييار تۇرۇشىڭلار كېرەك» دېدى.
فەۋزان دۆلەتنى قوغداش، چېگرالاردا مۇداپىئەدە تۇرۇش، تاجاۋۇزچىلىق ھۇجۇملىرىنى چېكىندۈرۈش ۋە دۆلەت زېمىنىغا چېقىلماقچى بولغانلارنى جازالاشنىڭ ئەڭ چوڭ ۋەزىپە ئىكەنلىكىنى ئېيتتى. ئۇ بولۇپمۇ مۇسۇلمانلارنىڭ مۇقەددەس جايلىرى جايلاشقان بۇ دۆلەتنى قوغداش ئۈچۈن كىشىلەرنىڭ جېنىنى پىدا قىلىدىغانلىقى ھەققىدە سىگنال بەردى.
يەمەندىكى ھۇسىيلار بىر مەزگىلدىن بۇيان سەئۇدى ئەرەبىستاننىڭ چېگرا رايونلىرىنى ۋە جەنۇبىي ۋىلايەتلىرىنى باشقۇرۇلىدىغان بومبا ۋە ئۇچقۇچىسىز ھاۋا ئاپپاراتلىرى بىلەن نىشان قىلماقتا.
