ھىندىستاندا سوت مەھكىمىسى بىر ئوقۇغۇچىنىڭ مەكتەپتە ياغلىق ئارتىشىغا رۇخسەت سوراپ سۇنغان ئىلتىماسىنى قوبۇل قىلمىدى.
NDTV قانىلىنىڭ خەۋىرىگە قارىغاندا، ھىندىستاندىكى ئاللاھئاباد يۇقىرى سوت مەھكىمىسى، ئۇتتار پرادېش ئىشتاتىدىكى بىر ئوقۇغۇچىنىڭ مەكتەپ فورمىسىنىڭ سىرتىدا ياغلىق ئارتىشىغا رۇخسەت قىلىنىشىنى تەلەپ قىلىپ سۇنغان ئىلتىماسىغا ئالاقىدار قارارىنى ئېلان قىلدى.
مائارىپ ئاپپاراتلىرى بېكىتكەن كىيىم-كېچەك قائىدىلىرىنىڭ ئوقۇغۇچىلارنىڭ شەخسىي تاللىشىغا ئاساسەن ئۆزگەرتىلمەيدىغانلىقى ھەققىدە ھۆكۈم چىقارغان سوت مەھكىمىسى، ئوقۇغۇچىنىڭ ئىلتىماسىنى رەت قىلدى.
ياغلىق ئارتىشنىڭ ئىسلامنىڭ «تۈپ دىنىي ئەمەللىرى» نىڭ بىرى ئىكەنلىكى ھەققىدىكى قاراشلارنىمۇ رەت قىلغان سوت مەھكىمىسى ئېلان قىلغان باياناتىدا: «يۇقىرى سوت مەھكىمىلىرى بىر ئايالنىڭ ياغلىق ئارتىشىنىڭ ئىسلام ئېتىقادىنىڭ تۈپ ئامىلى ئەمەسلىكى ۋە ياغلىق ئارتمىغان تەقدىردە كىشىنىڭ ئېتىقادىنىڭ خەۋپكە ئۇچرىمايدىغانلىقى مەسىلىسىدە پىكىر بىرلىكىگە ئىگە» دېگەنلەرنى ئىلگىرى سۈردى.
ئۇتتار پرادېش ئىشتاتىنىڭ پراياگراج شەھىرىدىكى بىر خۇسۇسىي مەكتەپتە ئوقۇيدىغان ئوقۇغۇچى، ئانىسى ئارقىلىق ئاللاھئاباد يۇقىرى سوت مەھكىمىسىگە ئىلتىماس سۇنۇپ، مەكتەپ فورمىسى بىلەن بىرگە ياغلىق ئارتىشىغا رۇخسەت قىلىنىشىنى تەلەپ قىلغان ئىدى.
