ئېنېرگىيە ۋە تەبىئىي بايلىقلار مىنىستىرلىقى مۇھىت ئاسراشنى مەركەز قىلغان پائالىيەتلىرى بىلەن يېقىنقى 7 يىلدا جەمئىي 4.41 مىليارد لىرا مەبلەغ سېلىپ، 7.62 مىليارد لىرانىڭ تېجەپ قېلىنىشىنى ئىشقا ئاشۇردى.
تۈركىيە جۇمھۇرىيىتى ئېنېرگىيە ۋە تەبىئىي بايلىقلار مىنىستىرلىقى بايانات ئېلان قىلىپ، «2053-يىللىق ساپ نۆل قويۇپ بېرىش» نىشانى يۆنىلىشىدە ئىستراتېگىيە ياراتقان مىنىستىرلىق، يېشىل ئۆزگىرىش مۇساپىسىنى قوللايدىغان مۇھىت ئاسراش لايىھەلىرىنى داۋاملاشتۇرماقتا. بۇ دائىرىدە، 2019-يىلىدىن 2025-يىلىغىچە بولغان ئارىلىقتا مۇھىت پائالىيەتلىرىگە جەمئىي 4.41 مىليارد لىرا مەبلەغ سېلىندى.
مىنىستىرلىق قايتا ھاسىل بولىدىغان ئېنېرگىيە مەبلىغى ئارقىلىقمۇ پاكىز مۇھىت يارىتىش يولىدا مۇھىم نەتىجىلەرنى قولغا كەلتۈردى. ئۆتكەن يىلى ئىشلەپچىقىرىلغان 156 مىڭ 999 گىگاۋات-سائەت قايتا ھاسىل بولىدىغان ئېنېرگىيە سايىسىدا، تەخمىنەن 91 مىليون توننا كاربون تۆت ئوكسىد قويۇپ بېرىلىشىنىڭ ئالدى ئېلىندى. بۇ مىقدار تەخمىنەن 8.27 مىليارد دەرەخ بىر يىلدا سۈمۈرەلەيدىغان كاربون مىقدارىغا تەڭ دەپ ھېسابلانماقتا.
مۇھىتنى ياشارتىش پائالىيەتلىرى دائىرىسىدە، مىنىستىرلىق پەقەت 2025-يىلىلا جەمئىي 371.29 گېكتارلىق يەرگە 531 مىڭ 869 تۈپ كۆچەت تىكىپ، تەخمىنەن 5 مىڭ 851 توننا كاربون قويۇپ بېرىش مىقدارىنى ئازايتتى. ئومۇمىي جەھەتتىن ئالغاندا، 2019 — 2025-يىللىرى ئارىسىدا 4 مىڭ 532 گېكتار يەرگە 4.9 مىليون تۈپ كۆچەت تىكىلدى ۋە بۇ 7 يىللىق خىزمەت نەتىجىسىدە جەمئىي 54 مىڭ 409 توننا كاربون تۆت ئوكسىدنىڭ ئاتموسفېراغا قويۇپ بېرىلىشى توسۇپ قېلىندى.
«نۆل تاشلاندۇقنى بىر تەرەپ قىلىش تۈرى» ئارقىلىق 2025-يىلى 7 مىڭ 174 توننا تاشلاندۇق قايتا پىششىقلاپ ئىشلىتىلىپ، 8 مىڭ 960 تۈپ دەرەخنىڭ كېسىلىپ كېتىشىنىڭ ئالدى ئېلىندى. شۇنىڭ بىلەن بىر ۋاقىتتا، ئۆتكەن يىلى 10.2 مىليون كۇب مېتىر سۇ ساپلاشتۇرۇلغان بولۇپ، بۇنىڭ %83ى قايتا قوللىنىلدى.
ئېنېرگىيە ۋە تەبىئىي بايلىقلار مىنىستىرى ئالپئارسلان بايراقتار ئىجتىمائىي تاراتقۇ ھېساباتىدىكى ئۇچۇر ھەمبەھرىلەپ: «كېيىنكى ئەۋلادلارغا ياشاشقا تېخىمۇ مۇۋاپىق، يېشىل ۋە پاكىز بىر دۇنيا قالدۇرۇش ئۈچۈن تىرىشىۋاتىمىز. دۆلىتىمىزنىڭ يېشىل ئۆزگىرىش سۈرئىتىنى ئاشۇرىدىغان قەدەملەرنى قەتئىيلىك بىلەن تاشلاپ، تەبىئەت بىلەن ماسلاشقان ۋە ئۆز بايلىقلىرى بىلەن تەرەققىي قىلىدىغان بىر تۈركىيە بەرپا قىلىش ئۈچۈن ئىزدىنىۋاتىمىز. نۆل تاشلاندۇق ۋە ئېنېرگىيە ئۈنۈمدارلىقىنى ئوخشاش بىر مەنبەنىڭ ئىككى تۈپ ئامىلى دەپ بىلىمىز. تەبىئەت بىزگە سۇنغان بىباھا ئامانەتنى قوغداش ئۈچۈن ئىسراپچىلىقنىڭ ئالدىنى ئېلىپ، تەبىئىي بايلىقلىرىمىزدىن ئەڭ توغرا شەكىلدە پايدىلىنىۋاتىمىز. تېخىمۇ يېشىل ۋە پاكىز ئەتەگە يېتىش ئىشەنچىسى بىلەن دۇنيا مۇھىت ئاسراش كۈنى ۋە تۈركىيە مۇھىت ئاسراش ھەپتىلىكى مۇبارەك بولسۇن.» دېگەنلەرنى قەيت قىلدى.
