ئامېرىكادا چىقىدىغان «ۋاشىنگتون پوچتا گېزىتى» نىڭ ھازىرقى ۋە سابىق يۇقىرى دەرىجىلىك ئەمەلدارلارنى مەنبە كۆرسىتىپ ئېلان قىلغان خەۋىرىگە قارىغاندا، ترامپ ھۆكۈمىتى ئىراندا يۈز بېرىۋاتقان ئۇرۇشنىڭ ئاخىرلىشىشى ۋە ھورمۇز بوغۇزىنىڭ قايتىدىن خەلقئارا دېڭىز قاتنىشىغا ئېچىۋېتىلىشى ئۈچۈن دىپلوماتىك تىرىشچانلىقىنى داۋاملاشتۇرۇۋاتقان بىر پەيتتە، ئىسرائىلىيەنىڭ ئىراننىڭ باش سۆھبەت ۋەكىللىرىنى نىشان قىلىشىدىن ئەنسىرىگەن.
خەۋەردە ئىلگىرى سۈرۈلۈشىچە، ئامېرىكا قوشما ئىشتاتلىرى ھۆكۈمىتى بولۇپمۇ ئىران تاشقى ئىشلار مىنىستىرى ئابباس ئاراقچى بىلەن پارلامېنت رەئىسى مۇھەممەد باقىر قالىبافقا قارىتا قىلىنىش ئېھتىماللىقى بولغان سۇيىقەست پىلانلىرىغا قاتتىق قارشى تۇرغان، شۇ سەۋەبتىن ئەتىياز ئايلىرىدا مۇرەسسەچىلەر ئارقىلىق تېھرانغا ئىسرائىلىيەنىڭ نىيىتى توغرىسىدا ئاگاھلاندۇرۇش ئەۋەتكەن.
كىملىكىنى ئاشكارىلاشنى خالىمىغان بىر ئامېرىكا ئەمەلدارى: «ئەگەر سىز بۇ كىشىلەرنى ئۆلتۈرسىڭىز، پىراگماتىستلارنىمۇ يوقاتقان بولىسىز» دېگەن.
خەۋەرگە ئاساسلانغاندا، ترامپ ھۆكۈمىتى ئۇرۇشنى ئاخىرلاشتۇرۇشقا قارىتا دىپلوماتىك تاللاشلارنى مۇزاكىرە قىلىشقا باشلىغان مارت ئېيىدىن بۇيان، ئامېرىكا ئەمەلدارلىرى ئىسرائىلىيەلىك كەسپداشلىرىغا ئىراننىڭ سىياسىي رەھبەرلىرىگە قارىتا سۇيىقەستلەرنى داۋاملاشتۇرماسلىق ھەققىدە سىگنال بەرگەن.
ئانالىزچىلار بولسا ۋاشىنگتوننىڭ ئىرانغا بىۋاسىتە ئاگاھلاندۇرۇش ئەۋەتىش ئېھتىياجىنى ھېس قىلىشى، ئامېرىكا بىلەن ئىسرائىلىيە ئوتتۇرىسىدىكى پىكىر ئىختىلاپىنى ۋە ترامپ ھۆكۈمىتىنىڭ ئىسرائىلىيە ھۆكۈمىتىگە بولغان تەسىرىنىڭ چەكلىك ئىكەنلىكىنى كۆرسىتىپ بېرىدۇ، دەپ قارىماقتا.
ئىلگىرى سۈرۈلگەن پىكىرلەرگە قارىغاندا، ئىسرائىلىيەنىڭ مارت ئېيىنىڭ ئوتتۇرىلىرىدا ئىراننىڭ يۇقىرى دەرىجىلىك دۆلەت خەۋپسىزلىك ئەمەلدارى ئەلى لارىجانىنى ئۆلتۈرۈشى، ۋاشىنگتون بىلەن تېل ئاۋىۋ ئوتتۇرىسىدىكى پىكىر ئىختىلاپىنى تېخىمۇ چوڭقۇرلاشتۇرۇۋەتكەن.
