سۈرىيەنىڭ ھەرقايسى رايونلىرىدا ھۆكۈمەتنىڭ دۇنيا مىقياسىدىكى باھا ئۆسۈشىنى سەۋەب قىلىپ، يېقىلغۇ باھاسىنى ئۆستۈرۈشىگە قارشى نامايىش ئۆتكۈزۈلدى.
سۈرىيە ئېنېرگىيە مىنىستىرلىقى بېنزىن باھاسىنى %28، دىزېل باھاسىنى %40، ئائىلىلەردە ئىشلىتىلىدىغان سۇيۇقلاندۇرۇلغان گاز باھاسىنى %8.8 ئۆستۈرگەندىن كېيىن، ھەلەب، دەيرۇززور، ھاسەكە ۋە ئىدلىب ئۆلكىلىرىدە خەلق نامايىش قىلدى.
باھا ئۆستۈرۈش قارارىنىڭ قايتا قاراپ چىقىلىشىنى تەلەپ قىلغان نامايىشچىلار بەزى يوللارنى توسۇۋېلىپ، چاقلارنى كۆيدۈردى.
سۈرىيە ئۇچۇر مىنىستىرلىقىنىڭ چەت ئەل تاراتقۇلىرى بۆلۈمى يېقىلغۇ باھاسىنىڭ ئۆستۈرۈلۈشىگە دائىر يازما بايانات ئېلان قىلدى. باياناتتا باھا ئۆسۈشىنىڭ سەۋەبى خەلقئارا ئېنېرگىيە بازىرىدىكى داۋالغۇش، نېفىت ئايرىش ئىقتىدارىغا بولغان بېسىم ۋە ئىمپورتقا يۇقىرى دەرىجىدە تايىنىش دەپ كۆرسىتىلدى.
مىنىستىرلىقنىڭ سانلىق مەلۇماتىغا قارىغاندا، ئىمپورت قىلىنىدىغان نېفىت مەھسۇلاتلىرى ۋە تەبىئىي گازنى تەمىنلەش تەننەرخى كۈنىگە تەخمىنەن 25 مىليون 200 مىڭ دوللارغا، ئايلىقىغا 755 مىليون 600 مىڭ دوللارغا يەتكەن.
مىنىستىرلىق سۈرىيەنىڭ كۈندىلىك خام نېفىت ئىشلەپچىقىرىش مىقدارىنىڭ تەخمىنەن 100 مىڭ ۋارىل ئىكەنلىكىنى، ئەمما ئىشلەپچىقىرىلغان نېفىتنىڭ %75 تىن كۆپرەكى ئېغىر تىپتىكى خام نېفىت بولغاچقا، ھازىرقى نېفىت ئايرىش زاۋۇتلىرىنىڭ ئىچكى بازار ئېھتىياجلىق بولغان مەھسۇلات تۈرلىرىنى تەمىنلىيەلمەيدىغانلىقىنى بىلدۈردى.
باياناتتا بانىياس نېفىت ئايرىش زاۋۇتىدا كەڭ كۆلەملىك رېمونت قىلىش ۋە ئەسلىگە كەلتۈرۈش خىزمەتلىرىنىڭ ئېلىپ بېرىلىۋاتقانلىقى قەيت قىلىندى. خىزمەتلەر تاماملانغاندىن كېيىن، زاۋۇتنىڭ كۈندىلىك ئىشلەپچىقىرىش ئىقتىدارىنى 80 مىڭ ۋارىلدىن 130 مىڭ ۋارىلغا يەتكۈزۈش نىشان قىلىنماقتا.
باياناتتا يېڭى يېقىلغۇ باھاسىنىڭ مەڭگۈلۈك ئەمەسلىكى تەكىتلىنىپ: «باھا بەلگىلەش مېخانىزمى تەننەرختىكى ئۆزگىرىشلەرنى ھەر ئىككى يۆنىلىشتە ئەكس ئەتتۈرىدىغان شەكىلدە لايىھەلەندى. خەلقئارا تەننەرخ تۆۋەنلىسە، باھالارمۇ قايتا تۆۋەنلىتىلىدۇ» دېيىلدى.
