دېڭىز يۈزىدىن 1607 مېتىر ئېگىزلىككە جايلاشقان ئىسسىق كۆلدە، سۇ ئۈستىدىكى فورمولا دەپ ئاتالغان F1H2O خەلقئالىق كېمە تەنتەربىيە چامپىيونلۇقى ئۆتكۈزۈلمەكتە.

بىرلەشمە ئەرەب خەلىپىلىكىدىن كاناداغىچە، ئەنگىلىيەدىن ئامېرىكاغىچە بولغان 13 دۆلەتتىن كەلگەن 8 گۇرۇپپا ۋە 18 ماھىرنى بىر يەرگە جەم قىلغان 2026-يىللىق F1H2O دۇنيا چامپىيونلۇقىنىڭ ئېچىلىش مۇراسىمى ئۆتكۈزۈلدى.

قىرغىزىستان دۆلەت رەئىسى سادىر جاپاروۋنىڭ تەشەببۇسى بىلەن قىرغىزىستاندا تۇنجى قېتىم ئۆتكۈزۈلۈۋاتقان بۇ چامپىيونلۇق مۇسابىقىسىنىڭ، قىرغىزىستاننىڭ خەلقئارالىق ئوبرازىنى ئۆستۈرۈش ۋە ساياھەتچىلىك ئىقتىدارىغا تۆھپە قوشۇشى نىشان قىلىنماقتا.

بۇ چوڭ پائالىيەتنىڭ ئېچىلىش مۇراسىمىغا دۆلەت رەئىسى جاپاروۋدىن باشقا يەنە قازاقىستان دۆلەت رەئىسى قاسىم-جومەرت توقايېۋ، ئۆزبېكىستان دۆلەت رەئىسى شەۋكەت مىرزىيويېۋ، تاجىكىستان دۆلەت رەئىسى ئىمامئەلى راخمان، H2O Racing نىڭ قۇرۇغۇچىسى نىكولو دى سان گېرمانو ۋە خەلقئارا تەنتەربىيە بىرلەشمىسىنىڭ رەئىسى راففائېل چىئۇللى قاتناشتى.

جاپاروۋ قىلغان سۆزىدە، خەلقئارالىق كېمە تەنتەربىيە چامپىيونلۇقىنى ئۆتكۈزۈشتىكى تۇنجى قەدەمنىڭ ئۆتكەن مارت ئېيىدا خەلقئارا تەنتەربىيە بىرلەشمىسىنىڭ رەئىسى راففائېل چىئۇللى بىلەن ئۆتكۈزۈلگەن كۆرۈشۈشتە باشلانغانلىقىنى ئېيتتى.

مۇراسىمغا قاتناشقان قازاقىستان، ئۆزبېكىستان ۋە تاجىكىستان رەھبەرلىرىگە تەشەككۈر ئېيتقان جاپاروۋ: «مۇشۇنداق قەدەم ۋە تەشەببۇسلار ئوتتۇرا ئاسىيا رايونىنىڭ ئىشەنچ، ئۆزئارا ھۆرمەت، يېقىن دوستلۇق ۋە ئورتاق تەرەققىيات رايونىغا ئايلانغانلىقىنى ئىسپاتلاپ بەرمەكتە» دېدى.