گىرېتسىيە باش مىنىستىرى كىرىياكوس مىچوتاكىس بىرلەشكەن دۆلەتلەر تەشكىلاتى (ب د ت) 81-نۆۋەتلىك ئومۇمىي كېڭەش يىغىنىدا قىلغان سۆزى جەريانىدا، تۈركىيە-گىرېتسىيە مۇناسىۋىتى ئۈستىدىمۇ توختالدى. ئۇ ئىككى دۆلەت مۇناسىۋىتىنى ياخشىلاش جەريانى ھەققىدە: «يېقىنقى ئۈچ يىلدىن بۇيان مۇناسىۋەتلىرىمىزنى ياخشىلاش، ئۆزئارا ئىشەنچ تۇرغۇزۇش ۋە سۆھبەت يوللىرىنى ئوچۇق تۇتۇش ئۈچۈن ئۈزلۈكسىز تىرىشچانلىق كۆرسىتىۋاتىمىز، شۇ ئارقىلىق ئارزۇ قىلىنمايدىغان كىرىزىسلارغا سەۋەب بولۇشى مۇمكىن بولغان يوشۇرۇن جىددىيچىلىكنىڭ ئالدىنى ئالغىلى بولىدۇ» دېدى.

مىچوتاكىس تۈركىيە بىلەن گىرېتسىيە ئوتتۇرىسىدا تارىخنىڭ يۈكىنى كۆتۈرۈۋاتقان سەزگۈر بىر مۇناسىۋەت بارلىقىنى، رايونلۇق ۋە كەڭ كۆلەملىك ئۆزگىرىشلەر كۆزدە تۇتۇلغاندا، كەلگۈسىدە قانداق قەدەم تاشلاش توغرىسىدا ئىككى دۆلەتنىڭ جىددىي تۈردە ئورتاق بىر چۈشەنچىگە ئېھتىياجلىق ئىكەنلىكىنى بىلدۈردى. بۇ چۈشەنچىنىڭ خەلقئارا قانۇن ۋە ياخشى قوشنىدارچىلىق مۇناسىۋەتلىرىگە ھۆرمەت قىلىش ئاساسىدا بولۇشى كېرەكلىكىنى تەكىتلىگەن باش مىنىستىر: «مېنىڭ نۇرغۇن قېتىم ئېيتقىنىمدەك، جۇغراپىيەنى ئۆزگەرتەلمەيمىز، يانمۇيان ياشاش بىزنىڭ تەقدىرىمىز» دېگەنلەرنى قەيت قىلدى.

مىچوتاكىسنىڭ ئىلگىرى سۈرۈشىچە، تۈركىيە بىلەن گىرېتسىيە ئوتتۇرىسىدىكى بىردىنبىر ئىختىلاپ «مۇتلەق ئىقتىسادىي رايون» ۋە قۇرۇقلۇق سىزىقىنى بېكىتىش مەسىلىسى بولۇپ، ب د ت دېڭىز ھوقۇقى ئەھدىنامىسى بۇ مەسىلىلەرنى ھەل قىلىشتىكى بىردىنبىر تۈزۈلمىلىك رامكا ھېسابلىنىدىكەن.

قىبرىس مەسىلىسى ھەققىدىمۇ توختالغان كىرىياكوس مىچوتاكىس، بۇ مەسىلىنىڭ ب د ت نىڭ ئۆز قارارلىرىنى ئىجرا قىلىش ئىقتىدارىنى كۆرسىتىپ بېرىشتىكى «سىناق تېشى» ئىكەنلىكىنى ئوتتۇرىغا قويدى. ئۇ يەنە، ب د ت باش كاتىپى ئانتونىئو گۇتېررېسنىڭ بۇ مەسىلە توغرىسىدىكى سۆھبەتلەرنى قايتا باشلاش يولىدىكى خىزمەتلىرىنى قوللايدىغانلىقىنى ئەسكەرتتى.