يەمەن ئۇچۇر –ئاخبارات مىنىستىرى مۇئەممەر ئەلئىريانى X سۇپىسىدا ئېلان قىلغان باياناتىدا، ھۇسىيلارنىڭ سارايغا بەش دانە باشقۇرۇلىدىغان بومبا ئاتقانلىقىنى، ھۇجۇم پەيتىدە سارايدا تۇرۇۋاتقان يەمەن باش مىنىستىرى ۋە كابىنېت ئەزالىرىنىڭ ئەھۋالىنىڭ ياخشى ئىكەنلىكىنى بىلدۈردى.
سەھىيە مىنىستىرى قاسىم بۇھەيبىھنىڭ بىلدۈرۈشىچە، ئۆلگەن بەش كىشى ساراي قوغدىغۇچىلىرى ۋە پۇقراۋى خادىملاردىن ئىكەن؛ ھۇجۇمدا 16 كىشى يارىلانغان.
يەمەن مىنىستىرلار كېڭىشى سارايغا ئۇچقۇچىسىز ھاۋا ئاپپاراتلىرى ۋە باشقۇرۇلىدىغان بومبىلار بىلەن ھۇجۇم قىلىنغانلىقىنى بىلدۈردى. كېڭەشنىڭ باياناتىدا بۇ ھۇجۇم، «ھۇسىيلارنىڭ يەمەن خەلقىنىڭ دۆلەت ھوقۇقىنى قايتا تىكلەش ئىرادىسى ئالدىدا مەغلۇپ بولۇپ، پۇقراۋى ئۇل ئەسلىھەلەرنى ھۇجۇم نىشانى قىلغان بۇزغۇنچىلىق قىلىش ھەرىكەتلىرىگە يۈزلەنگەنلىكى» نىڭ ئىسپاتى دەپ باھالاندى.
باياناتتا، ھۇجۇمنىڭ ھۆكۈمەتنىڭ ئىرادىسىنى ئاجىزلاشتۇرالمايدىغانلىقى، ھۇسىيلارنىڭ ھاكىمىيەتنى تارتىۋېلىشىغا خاتىمە بېرىش يولىدىكى كۈرەشنىڭ داۋاملىشىدىغانلىقى تەكىتلەندى. خەلقئارا جەمئىيەت پۇقرالار ۋە پۇقراۋى ئۇل ئەسلىھەلەرگە قارىتىلغان ھۇجۇملارنىڭ ئالدىنى ئېلىش ئۈچۈن ئېنىق پوزىتسىيە بىلدۈرۈش ۋە زۆرۈر بولغان بېسىملارنى ئىشلىتىشكە چاقىرىلدى.
يەمەندە 2014-يىلى سېنتەبىردە ھۇسىيلار پايتەخت سەنئا ۋە بىر قىسىم ۋىلايەتلەرنى كونتروللۇقىغا ئېلىۋالغاندىن بۇيان ئىچكى ئۇرۇش داۋاملاشماقتا. سەئۇدى ئەرەبىستان باشچىلىقىدىكى ئەرەب ئىتتىپاقى 2015-يىلى مارتتىن بۇيان خەلقئارا جەمئىيەت ئېتىراپ قىلغان يەمەن ھۆكۈمىتىنى قوللاپ كەلمەكتە.
