تېل ئاۋىۋ دائىرىلىرى ئامېرىكانىڭ ۋاسىتىچىلىكىدە ھاسىل قىلىنغان ئۇرۇش توختىتىش كېلىشىمىگە ئۈزلۈكسىز خىلاپلىق قىلىۋاتقان بىر پەيتتە، ئىسرائىلىيە ئارمىيەسى لىۋاننىڭ جەنۇبىدا ھىزبۇللاھ پۇقرا دەپ جاكارلىغان ئالتە كىشىنى ئۆلتۈرگەنلىكىنى ئېلان قىلدى.
ئىسرائىلىيە ئارمىيەسى پەيشەنبە كۈنى ئېلان قىلغان بىر باياناتىدا، ھاياتىدىن ئايرىلغان بۇ كىشىلەرنىڭ ھىزبۇللاھ جەڭچىلىرى ئىكەنلىكىنى، ئۇلارنىڭ شەرقىي زەۋتار بازىرى ۋە ئەلى ئەتتاھىر تۆپىلىكلىرىدە ئىسرائىلىيە قىسىملىرىغا «تەھدىت پەيدا قىلغانلىقى» نى دەۋا قىلدى.
ئەمما، ئىسرائىلىيە ئارمىيەسى ئۆلگەنلەرنىڭ كىملىكىنى ياكى ئۆز قىسىملىرىغا دۇچ كەلگەنلىكى ئىلگىرى سۈرۈلگەن تەھدىتنىڭ خاراكتېرىنى ئىسپاتلايدىغان ھېچقانداق پاكىت كۆرسەتمىدى.
ھىزبۇللاھ ئۆزلىرىنىڭ ئۇرۇش توختىتىش كېلىشىمىگە قاتتىق رىئايە قىلىۋاتقانلىقىنى، شۇنداق تۇرۇقلۇق ئىسرائىلىيەگە تەۋە ئۇچقۇچىسىز ھاۋا ئاپپاراتلىرىنىڭ لىۋاننىڭ جەنۇبىدىكى پۇقرالارنى زەربە ئوبيېكتى قىلىشى كېلىشىمگە قىلىنغان «ئاشكارا» خىلاپلىق قىلمىشى ئىكەنلىكىنى بىلدۈردى.
ھىزبۇللاھ باياناتىدا يەنە، مەزكۇر ھۇجۇمنىڭ ناباتىيە رايونىدىكى كىفار رېمان بازىرىدا ئىككى پۇقرانى ھۇجۇم نىشانى قىلغانلىقىنى ۋە ئۇلارنىڭ قازا قىلغانلىقىنى ئېلان قىلدى.
مەزكۇر تەشكىلات بۇ ھۇجۇمنىڭ، ئىسرائىلىيە ئارمىيەسى تەرىپىدىن يېقىنقى 48 سائەت ئىچىدە لىۋانلىق پۇقرالارغا قارشى قەستەن ئېلىپ بېرىلغان ئىككىنچى قېتىملىق ھۇجۇم ئىكەنلىكىنى تەكىتلىدى.
ھىزبۇللاھ ئۇرۇش توختىتىش كېلىشىمىگە داۋاملىق ئەمەل قىلىدىغانلىقىنى بىلدۈرۈش بىلەن بىرگە، ئىسرائىلىيەنىڭ خىلاپلىق قىلىش قىلمىشلىرىنى يېقىندىن كۆزىتىپ، ھۆججەتلەشتۈرۈشنى داۋاملاشتۇرىدىغانلىقىنى ئېيتىپ ئاگاھلاندۇردى.
كېيىن ئېلان قىلىنغان يەنە بىر باياناتتا، ئىسرائىلىيە ئارمىيەسىنىڭ پەيشەنبە كۈنى لىۋاننىڭ جەنۇبىدىكى زەۋتار بازىرىدا ھىزبۇللاھ ئەزالىرىنى ئۆلتۈرگەنلىكىگە ئائىت دەۋالىرى رەت قىلىندى ۋە قازا قىلغانلارنىڭ ئۆز يۇرتىغا قايتىپ ئۆي-ماكانلىرىنى كۆزدىن كەچۈرۈۋاتقان مۇساپىر پۇقرالار ئىكەنلىكى ئوتتۇرىغا قويۇلدى.
بۇنىڭدىن ئىلگىرى، لىۋان دۆلەتلىك خەۋەر ئاگېنتلىقى (NNA) ئىسرائىلىيەنىڭ ناباتىيەدىكى تال ئەلدابشا بىلەن دۇھا كىفار رېمان ئوتتۇرىسىدىكى يولدا كېتىۋاتقان بىر جىپ ماشىنىغا ئۇچقۇچىسىز ھاۋا ئاپپاراتى بىلەن قىلغان ھۇجۇمىدا ئىككى كىشىنىڭ ھاياتىدىن ئايرىلغانلىقىنى خەۋەر قىلغان ئىدى.
خەۋەر ئاگېنتلىقىنىڭ مەلۇماتىغا قارىغاندا، يەنە بىر ئايرىم ۋەقەدە، ئىسرائىلىيەنىڭ بىر ئۇچقۇچىسىز ھاۋا ئاپپاراتى بىن جۇبەيىل رايونىدىكى بىرئاشىت بازىرىغا ئىككى دانە ئاۋاز بومبىسى تاشلىغان.
بۇ ھۇجۇملار، ناباتىيە ئەلفەۋقادا يول قۇرۇلۇشى بىلەن شۇغۇللىنىۋاتقان ئىككى كىشى ئىسرائىلىيە تەرىپىدىن ئۆلتۈرۈلۈپ، بىر كىشى يارىلانغاندىن كېيىنلا يۈز بەردى.
ئىسرائىلىيە ئىشغالىيىتى
شۇنىڭ بىلەن بىر ۋاقىتتا، ئىسرائىلىيە ئارمىيەسى لىۋانغا قاراتقان ئىشغالىيىتى داۋاملىشىۋاتقان بىر پەيتتە، بەزى جەڭگىۋار بىرىگادىلىرىنى لىۋاننىڭ جەنۇبىدىن ئىسرائىلىيەگە چېكىندۈرۈشكە باشلىغانلىقىنى ئىلگىرى سۈردى.
ئىسرائىلىيە ئارمىيە رادىيوسى ھەربىي مۇخبىر دورون كادوشنىڭ سۆزلىرىنى نەقىل كەلتۈرۈپ، ئارمىيەنىڭ جەنۇبىي لىۋاندىكى قىسىملىرىنى ئازايتىشقا ۋە بەزى جەڭگىۋار بىرىگادىلىرىنى ئىسرائىلىيەگە قايتۇرۇپ چىقىشقا باشلىغانلىقىنى خەۋەر قىلدى.
رادىيو ئىستانسىسى بۇ قەدەمنىڭ، لىۋاننى ئىشغال قىلغان جەڭگىۋار قىسىملارنىڭ سانىنى ئازايتىش بىلەن بىرگە، بەزى بىرىگادىلارنىڭ «ئۇرۇش تەييارلىق سەۋىيەسىنى يۇقىرى كۆتۈرۈش» ۋە ئۇلارنى مەشىق باسقۇچىدا تۇتۇپ تۇرۇشنى مەقسەت قىلغان تېخىمۇ كەڭ دائىرىلىك پىلاننىڭ بىر قىسمى ئىكەنلىكىنى بىلدۈردى.
خەۋەردە، باش ئىشتابقا قاراشلىق زاپاس قىسىملارنىڭ كېيىن ئېھتىياج تۇغۇلغاندا قايتا ئىشلىتىلىدىغانلىقىمۇ تىلغا ئېلىندى.
مەلۇم قىلىنىشىچە، قورشاۋ ئاستىدىكى غەززەگە ئورۇنلاشقان بىرىگادىلار بىلەن لىۋاننى ئىشغال قىلغان بىرىگادىلارنىڭ يېقىن كەلگۈسىدە نۆۋەت ئالماشتۇرۇشى كۈتۈلۈۋاتقان بولۇپ، بەزى قىسىملار شىمالىي سەپكە يۆتكىلىدىكەن، يەنە بەزىلىرى بولسا، جەنۇبقا ئەۋەتىلىدىكەن.
ئارمىيە رادىيوسىنىڭ خەۋىرىگە ئاساسلانغاندا، ئىسرائىلىيە ئارمىيەسى داۋاملىشىۋاتقان ئۇرۇش توختىتىش كېلىشىمىگە قارىماي لىۋاننىڭ جەنۇبىدىكى بىر قىسىم ئورۇنلارنى ئىشغال قىلىشنى داۋاملاشتۇرىدىكەن. لېكىن، بۇ جەرياندا ھەر بىر بىرىگادىنىڭ ئىشغالىيەت ۋەزىپىلىرىدىن نىسبەتەن يىراق تۇرۇپ، تەخمىنەن بىر ئاي بويىچە مەشىق ۋە تەييارلىق پائالىيەتلىرى بىلەن شۇغۇللىنىشى پىلانلانماقتىكەن.
مەلۇماتلارغا قارىغاندا، ئىسرائىلىيە 2-مارتتىن بۇيان لىۋانغا قاراتقان ھۇجۇملىرىدا 4200 دىن ئارتۇق كىشىنىڭ جېنىغا زامىن بولغان ۋە 12 مىڭدىن ئارتۇق كىشىنى يارىلاندۇرغان.
نۆۋەتتە، ئىسرائىلىيە لىۋاننىڭ جەنۇبىدىكى بەزى رايونلارنى ئىشغال قىلىشنى داۋاملاشتۇرماقتا. بۇ رايونلارنىڭ بەزىلىرى نەچچە ئون يىلدىن بۇيان ئىشغال ئاستىدا تۇرۇۋاتقان بولسا، يەنە بەزىلىرى 2023-2024-يىللىرىدىكى ھۇجۇملار جەريانىدا بېسىۋېلىنغان ئىدى.
ئىسرائىلىيە قىسىملىرى ئەڭ ئاخىرقى قېتىملىق ئىشغالىيىتى جەريانىدا، لىۋان تەۋەلىكىگە 10 كىلومېتىردىن ئارتۇق ئىچكىرىلەپ كىرگەن.
ئۆتكەن ھەپتە، ئامېرىكا قوشما ئىشتاتلىرى بىلەن ئىران ئوتتۇرىسىدا دائىمىي تىنچلىق كېلىشىمى ھاسىل قىلىش تىرىشچانلىقلىرىنىڭ بىر قىسمى سۈپىتىدە، لىۋاننىمۇ ئۆز ئىچىگە ئالغان نۇرغۇن سەپلەردە ھۇجۇملارنى ئاخىرلاشتۇرۇشنى كۆزدە تۇتىدىغان ئۆزئارا رامكا كېلىشىمى ئىمزالىغانىدى.
