رۇسىيە پىرېزىدېنتى ۋىلادىمىر پۇتىن ياۋروپاغا ھۇجۇم قىلىش پىلانىنىڭ يوقلۇقىنى ئەسكەرتىپ: «ئەگەر كالىنىنگرادنىمۇ ئۆز ئىچىگە ئالغان رۇسىيە زېمىنىغا بىۋاسىتە ھۇجۇم قىلىش ئەھۋالى كۆرۈلسە، دۆلىتىمىز ئىگە بولغان بارلىق قوراللارنى ئىشلىتىش مەسىلىسى مۇقەررەر ھالدا ۋە دەرھال كۈنتەرتىپكە كېلىدۇ» دېدى.
ۋىلادىمىر پۇتىن پايتەخت موسكۋادا ئۆتكۈزۈلگەن خەلقئارا ۋالداي مۇنازىرە كۇلۇبىنىڭ يىللىق يىغىنىدا، رۇسىيە بىلەن ياۋروپا ئەللىرى ئوتتۇرىسىدىكى جىددىيچىلىك ۋە ئۇكرائىنادىكى ئۇرۇش ھەققىدە توختالدى.
ئۇ رۇسىيە تاشقى ئىشلار مىنىستىرلىقىنىڭ كالىنىنگرادقا مۇناسىۋەتلىك باياناتىنى ۋە بەزى دۆلەتلەرگە يوللىغان خەتلىرىدىكى مەزمۇنلارنى قوللايدىغانلىقىنى تەكىتلىدى.
پۇتىن ھېچقانداق دۆلەتكە تەھدىت سالمايدىغانلىقلىرىنى بايان قىلىپ مۇنداق دېدى:
«بىز ھېچكىمنى قورقۇتمايمىز. رۇسىيە تاشقى ئىشلار مىنىستىرلىقىنىڭ ئېلان قىلغان باياناتى ۋە بەزى دۆلەتلەرگە يوللىغان خەتلىرى قورقۇتۇش ئۈچۈن ئەمەس، بەلكى بىزگە تەھدىت سېلىشقا ئۇرۇنغانلارغا قايتۇرۇلغان جاۋابتۇر.
بىز نە 2029-يىلى، نە 2030-يىلى، نە 2050-يىلى ھۇجۇم قىلىشنى پىلانلىمايمىز، ئەمما ھۇجۇمغا ئۇچرىساق جاۋاب قايتۇرۇشقا مەجبۇر بولىمىز. ياۋروپا ئەللىرىنىڭ پۇقرالىرى شۇنى ئېنىق چۈشىنىشى كېرەككى، بىزنىڭ پوزىتسىيەمىز بىلەن ئۇلارنىڭ دۆلىتىدىكى بەزى سىياسىي رەھبەرلەرنىڭ پوزىتسىيەسى ئوخشىمايدۇ.»
رۇسىيەنىڭ قارشىسىدا ئىقتىسادىي ۋە ھەربىي يوشۇرۇن كۈچى زور، نۇپۇسى رۇسىيەنىڭ ئىككى ھەسسىسىگە تەڭ كېلىدىغان بىر تەرەپنىڭ بارلىقىنى چۈشەندۈرگەن پۇتىن، بۇ تەھدىتكە قارىتا ئۆزلىرىدىكى كۈچ ۋە ۋاسىتىلەرنىڭ چەكلىك قالىدىغانلىقىنى، شۇڭا ئۆزلىرىنىڭ ئەۋزەللىكلىرىدىن پايدىلىنىشقا مەجبۇر بولىدىغانلىقىنى ئەسكەرتتى.
ۋىلادىمىر پۇتىن سۆزىنىڭ ئاخىرىدا: «بۈگۈنكى كۈندە رۇسىيە ئىگە بولغان قوراللار باشقا ھېچكىمدە يوق. بۇ بىزنىڭ ئەۋزەللىكىمىز» دېدى.
