سۈنئىي ئەقىل قوللىنىلغان سىستېمىلار ۋە ئۇچقۇچىسىز ھاۋا ئاپپاراتلىرى سەئۇدى ئەرەبىستان دائىرىلىرىنىڭ ھەج قىلغۇچىلارنىڭ زىچلىقىنى باشقۇرۇشىغا ۋە قائىدە-بەلگىلىمىلەرگە خىلاپلىق قىلىش قىلمىشلىرىنى ئۈنۈملۈك بېكىتىشىگە ياردەم بېرىشنى نىشان قىلىدۇ.
سەئۇدى ئەرەبىستاننىڭ «ئۇكاز» (Okaz) گېزىتى جۈمە كۈنى ئېلان قىلغان خەۋىرىدە، سەئۇدى ئەرەبىستان دائىرىلىرىنىڭ 2026-يىللىق ھەج مەزگىلىدە توپلاشقان ئاممىنى باشقۇرۇش، قائىدىگە خىلاپلىق قىلىش قىلمىشلىرىنى بېكىتىش ۋە مۇقەددەس جايلارغا رۇخسەتسىز كىرىشنىڭ ئالدىنى ئېلىش مەقسىتىدە، ئۇچقۇچىسىز ھاۋا ئاپپاراتلىرى، سۈنئىي ئەقىل ۋە ئىلغار كۆزىتىش تېخنىكىلىرىنى ئىشقا كىرىشتۈرگەنلىكىنى ئۇقتۇردى.
خەۋەردە، قوللىنىلىۋاتقان تېخنىكىلارنىڭ ھەر يىلى مىليونلىغان مۇسۇلمانلار بىر يەرگە جەم بولىدىغان مۇقەددەس جايلاردا بىخەتەرلىككە كاپالەتلىك قىلىشقا قارىتىلغان بىر گەۋدىلەشكەن خەۋپسىزلىك ۋە تەشكىللەش سىستېمىسىنىڭ بىر قىسمى ئىكەنلىكى ئەسكەرتىلدى.
دائىرىلەرنىڭ «رۇخسەتسىز ھەج قىلىشقا بولمايدۇ» دېگەن شۇئار ئاستىدا، بەلگىلىمىگە خىلاپلىق قىلغۇچىلارنى بېكىتىش ۋە قولغا ئېلىش مەقسىتىدە ئۇچقۇچىسىز ھاۋا ئاپپاراتلىرىدىن پايدىلىنىۋاتقانلىقى، شۇنداقلا مۇقەددەس جايلارغا يوشۇرۇن كىرىش ئۇرۇنۇشلىرىنى نازارەت قىلىش ۋەزىپىسىنى ئۈستىگە ئالغان مۇقىم قاناتلىق ھاۋا ۋاسىتىلىرىنىڭمۇ قوللىنىلىۋاتقانلىقى قەيت قىلىندى.
ئۇچقۇچىسىز ھاۋا ئاپپاراتلىرىنىڭ كەڭ رايونلارنى تېز ۋە ئۈنۈملۈك شەكىلدە تەكشۈرۈشكە ئىمكانىيەت يارىتىپ بېرىدىغانلىقى، نەق مەيداندىكى ئەترەتلەرگە بولسا گۇمانلىق ھەرىكەتلەر ۋە يوشۇرۇن كىرىش ئۇرۇنۇشلىرىغا ئائىت مۇھىم سىگناللارنى يەتكۈزىدىغانلىقى ئوتتۇرغا قويۇلدى.
مەزكۇر سىستېما دائىرىسىدە يەنە ئەقىللىق كۆزىتىش تورلىرى، يۇقىرى ئېنىقلىقتىكى كامېرالار ۋە تېرمال تەسۋىر ھاسىل قىلىش ئۈسكۈنىلىرىنىڭمۇ ئورۇن ئالغانلىقى بىلدۈرۈلدى.
دائىرىلەرنىڭ ئادەم زىچلىقىنى ئالدىن بېكىتىپ، قىستا-قىستاڭچىلىق شەكىللىنىشتىن بۇرۇن يۆنىلىش بەلگىلەپ بېرەلەيدىغان سۈنئىي ئەقىل قوللىنىلغان ئانالىز سىستېمىلىرىدىن پايدىلىنىۋاتقانلىقى، يۈز تونۇش تېخنىكىسى ئارقىلىق كىملىك بېكىتىش ۋە بىخەتەرلىك تەدبىرلىرىنىڭ كۈچەيتىلگەنلىكى تىلغا ئېلىندى.
ئىگىلىنىشىچە، ئىسلام دىنىنىڭ بەش پەرزىنىڭ بىرى بولغان ھەج ئىبادىتى بۇ يىل 25-مايدىن 27-مايغىچە بولغان ئارىلىقتا ئادا قىلىنىدىكەن. ئىقتىسادىي ۋە جىسمانىي جەھەتتىن ئىمكانىيىتى يار بېرىدىغان ھەر بىر مۇسۇلماننىڭ ئۆمرىدە كەم دېگەندە بىر قېتىم ھەج قىلىشى پەرز ئىكەن.
