دۆلەت مۇداپىئە مىنىستىرلىقى مەككە ئورتاق مۇداپىئە كېلىشىمىنىڭ ناتوغا رەقىپ ياكى ئىككىنچى تاللاش بولىدىغان ئورگان ئەمەسلىكىنى بىلدۈردى.
دۆلەت مۇداپىئە مىنىستىرلىقى ئاخبارات ۋە ئاممىۋى مۇناسىۋەتلەر مەسلىھەتچىسى ھەمدە مىنىستىرلىق باياناتچىسى باش بىرىگادا كوماندىرى زەكى ئاقتۈرك مىنىستىرلىقتا ئۆتكۈزۈلگەن ھەپتىلىك ئاخبارات ئېلان قىلىش يىغىنىدا سۆز قىلدى.
زەكى ئاقتۈرك ئۆزئارا ھەمكارلىقلار، رايون خاراكتېرلىك تەشەببۇسلار ۋە كۆپ دۆلەتلىك ۋەزىپىلەر دائىرىسىدە نۇرغۇن جۇغراپىيەلەردە ئۇتۇقلۇق ۋەزىپە ئۆتەۋاتقان تۈركىيە قوراللىق قىسىملىرىنىڭ رايون خاراكتېرلىك ۋە يەر شارى خاراكتېرلىك تىنچلىق ئۈچۈن يېتەكچى رول ئويناشنى داۋاملاشتۇرىدىغانلىقىنى تەكىتلىدى.
بۇ دائىرىدە تۈركىيە، پاكىستان ۋە سەئۇدى ئەرەبىستان ئوتتۇرىسىدا 7-ئاۋغۇستتا مەككە ئورتاق مۇداپىئە كېلىشىمى ئىمزالانغانلىقىنى ئەسكەرتكەن ئاقتۈرك، ئۈچ دۆلەت ئوتتۇرىسىدىكى مەۋجۇت دۇستلۇق ۋە قېرىنداشلىق مۇناسىۋەتلىرىنىڭ مۇداپىئە، بىخەتەرلىك ساھەسىدە تېخىمۇ ئالاھىدە ئورگانلاشقان ھەمدە داۋاملاشتۇرغىلى بولىدىغان بىرشەكىلدە تەشكىللىنىشى مەقسەت قىلىنغانلىقىنى ئېيتتى.
ئاقتۈرك كېلىشىمنىڭ ئاساسىي نىشانىنىڭ رايون خاراكتېرلىك بىخەتەرلىك ۋە مۇقىملىققا تۆھپە قوشۇش، ئۈچ دۆلەت ئوتتۇرىسىدىكى ھەربىي ھەمكارلىقنى تەرەققىي قىلدۇرۇش ھەمدە ئېھتىماللىق دائىرىسىدىكى كرىزىسلارغا قارشى ئورتاق ھەرىكەت ئىقتىدارىنى كۈچەيتىش ئىكەنلىكىنى بىلدۈرۈپ: «مەزكۇر كېلىشىم مۇداپىئە مەقسەتلىك بولۇپ، ھېچقانداق بىر دۆلەتنى ئورتاق دۈشمەن ياكى رىقابەتچى دەپ بېكىتمەيدۇ» دېدى.
ئاقتۈرك كېلىشىم دائىرىسىدە مۇداپىئە مىنىستىرلىرى، تاشقى ئىشلار مىنىستىرلىرى بىلەن باش ئىشتاب باشلىقلىرى، قوراللىق قىسىم قوماندانلىرىنىڭ ئىشتىراك قىلىشى ئارقىلىق ئىستراتېگىيەلىك سىياسىي ۋە ھەربىي مەخسۇس ئورگانلارنىڭ قۇرۇلۇشى ھەمدە ئۈچ دۆلەت ئوتتۇرىسىدىكى ماسلاشتۇرۇشنىڭ ئەڭ يۇقىرى سەۋىيەدە يۈرگۈزۈلۈشىنىڭ كۆزدە تۇتۇلغانلىقىنى ئىپادىلىدى.
زەكى ئاقتۈرك: «بۇ دائىرىدە قوماندانلىق ئورنى ۋە جغراپىيەلىك مانېۋىرلىرىدىن باشلاپ، كېيىنكى باسقۇچلاردا قۇرۇقلۇق، دېڭىز، ھاۋا مۇداپىئە ۋە ئۇچقۇچىسىز سىستېمىلارنىڭ ئىشتىراك قىلىشى بىلەن ئورتاق مانېۋىرلارنىڭ ئىجرا قىلىنىشى نىشان قىلىنماقتا» دېدى.
