گېرمانىيە دۆلەت خەۋپسىزلىك كېڭىشى گېرمانىيەنىڭ رۇسىيە تەرىپىدىن قىلىنىدىغان ئارىلاشما ھۇجۇملىرىنىڭ نىشانى بولۇشنى داۋاملاشتۇرىدىغانلىقىنى ئىلگىرى سۈردى.
ھۆكۈمەت باياناتچىسى ستېفان كورنېلىيۇس بۇ ھەقتە ئېلان قىلغان يازما باياناتىدا، دۆلەت خەۋپسىزلىك كېڭىشىنىڭ باش مىنىستىر فىرىدرىخ مېرزنىڭ رىياسەتچىلىكىدە جەم بولغانلىقىنى بىلدۈردى. يىغىندا ئاساسلىقى رۇسىيەنىڭ ئارىلاشما ھۇجۇملىرىنى ئۆز ئىچىگە ئالغان ھەر خىل خەۋپسىزلىك تەھدىتلىرى مۇزاكىرە قىلىندى ھەمدە جاسۇسلۇق ۋە بۇزغۇنچىلىق قىلمىشلىرىغا قارشى يېڭى تەدبىرلەرنى قوللىنىش قارار قىلىندى.
لەيپزىگ شەھىرىدە 4 – ئاۋغۇستتا يۈز بەرگەن رۇسىيە مەنبەلىك ئارىلاشما ھۇجۇم قىلىشقا ئۇرۇنۇش ۋەقەسىدىن كېيىن، بۇ خىل تەھدىتلەر يەنە بىر قېتىم ئەتراپلىق تەكشۈرۈپ چىقىلدى. كورنېلىيۇس: «گېرمانىيە رۇسىيەنىڭ ئارىلاشما ھۇجۇملىرىنىڭ نىشانى بولۇشنى داۋاملاشتۇرىدۇ، دەپ قارىماقتا» دېدى.
كېڭەش يەنە ھۆكۈمەتنىڭ كەلگۈسىدە يۈز بېرىش ئېھتىمالى بولغان ئارىلاشما ھۇجۇملىرىغا قانداق ئىنكاس قايتۇرىدىغانلىقى ئۈستىدە داۋاملىق خىزمەت ئىشلەش قارارى چىقاردى. يىغىندا جاسۇسلۇق ۋە بۇزغۇنچىلىققا قارشى يېڭى قەدەملەرنى تاشلاش بىلەن بىرگە، ھالقىلىق ئۇل ئەسلىھەلەرنى قوغداشنى كۈچەيتىشنىڭ زۆرۈرلۈكى تەكىتلەندى.
