فرانسىيە ۋە 25 دۆلەت بىلەن بىرگە ب د ت تاشقى مۇناسىۋەتلەر ۋە بىخەتەرلىك سىياسىتى ئالىي ۋەكىلى، چارشەنبە كۈنى، ئىراننىڭ نارازىلىق بىلدۈرگۈچىلەرنى ئۆلۈم جازاسىغا ھۆكۈم قىلىشنى داۋاملاشتۇرۇشىنى ۋە ئۆلۈم جازاسىنى ئىجرا قىلىشىنى «ئەڭ كۈچلۈك شەكىلدە» ئەيىبلىدى.
فرانسىيە تاشقى ئىشلار مىنىستىرلىقى تەرىپىدىن ئېلان قىلىنغان باياناتتا: «ئۆكتىچىلەرنى جىمىقتۇرۇش، جەمئىيەتكە ۋەھىمە سېلىش ۋە شەخسلەرنى ئاساسىي ھوقۇقلىرىنى ئىشلەتكەنلىكى سەۋەبىدىن جازالاش ئۈچۈن ئۆلۈم جازاسىنىڭ ئىشلىتىلىشى ھېچقاچان ھەقلىق كۆرسىتىلمەيدۇ» دېگەن سۆزلەرنى ئىشلەتتى.
ئىمزا قويغان دۆلەتلەر، ئىران خەلقىنىڭ پىكىر ئىپادە ئەركىنلىكىنى ۋە تىنچلىق بىلەن توپلىشىش ھوقۇقلىرىنى قورقۇنچ ھېس قىلماي ئىشلىتەلىشى كېرەكلىكىنى تەكىتلەپ: «ئىران ھاكىمىيىتىنى، ئۆلۈم جازاسىنى ئىجرا قىلىشنى دەرھال توختىتىشقا ۋە خالىغانچە تۇتقۇن قىلىنغان ھەممەيلەننى قويۇپ بېرىشكە چاقىرىق قىلىدۇ» دېدى.
باياناتتا يەنە ئىراننىڭ ئۆزگىرىش تەلەپ قىلىۋاتقان خەلقىنىڭ ئاۋازىغا قۇلاق سېلىشى ۋە كىشىلىك ھوقۇقلىرىغا ئېتىبار بېرىشىنى كاپالەتكە ئىگە قىلىدىغان ئەمەلىي قەدەملەرنى تاشلىشى كېرەكلىكى ھەققىدىمۇ چاقىرىق قىلىندى.
باياناتنى فرانسىيە، كانادا، گېرمانىيە، ئاۋسترالىيە، دانىيە، ئىسپانىيە، يېڭى زېلاندىيە، گوللاندىيە، پورپۇگالىيە، شۋېتسىيە ۋە ئەنگىلىيەگە ئوخشاش دۆلەتلەردىن باشقا يەنە ب د ت تاشقى مۇناسىۋەتلەر ۋە بىخەتەرلىك سىياسىتى ئالىي ۋەكىلى كاجا كاللاسمۇ ئىمزالىدى.
ئىران تاشقى ئىشلار مىنىستىرى ئابباس ئاراقچى بولسا كىشىلىك ھوقۇق ۋە خەلقئارالىق قانۇن مەسىلىسىدىكى باياناتلارغا مۇناسىۋەتلىك مەزكۇر دۆلەتلەرنى ئىككى يۈزلىمىچىلىك بىلەن ئەيىبلەپ، X تا ھەمبەھرىلىگەن ئۇچۇرىدا: «فرانسىيەگە ئوخشاش دۆلەتلەر دۇنياغا كىشىلىك ھوقۇق ۋە خەلقئارالىق قانۇن دەرسلىرى بېرىشنى توختىتىشى كېرەك. ئىككى يۈزلىمىچىلىك ئوچۇق-ئاشكارا ۋە ئورۇنسىزدۇر. غەززەدە ئىسرائىلىيەنىڭ ئىرقىي قىرغىنچىلىقىنى قوللىشىڭلار ۋە ئىرانغا قارشى يۈرگۈزۈۋاتقان تاجاۋۇزچىلىقىڭلار ئۆزۈڭلارغا ئارتىۋالغان بارلىق ئەخلاقىي ئۈستۈنلۈكنى يوقاتتى» دېدى.
