ئەزەربەيجان پىرېزىدېنت مەھكىمىسىنىڭ باياناتىغا ئاساسلانغاندا، پايتەخت باكۇدا زىيارەتتە بولۇۋاتقان تۈركىيە ئەدلىيە مىنىستىرى ئاقىن گۈرلەكنى پىرېزىدېنت ئىلھام ئەلىيېۋ قوبۇل قىلغان.
مىنىستىر گۈرلەك جۇمھۇر رەئىس رەجەپ تاييىپ ئەردوغاننىڭ سالىمىنى ئەلىيېۋغا يەتكۈزگەن، ئەلىيېۋمۇ سالىمى ئۈچۈن ئەردوغانغا رەھمەت ئېيتقان.
گۈرلەك ئورتاق تارىخ، مەدەنىيەت ۋە قېرىنداشلىق رىشتىگە ئاساسلىنىدىغان تۈركىيە-ئەزەربەيجان مۇناسىۋەتلىرىنىڭ، ئىككى دۆلەت رەھبەرلىرى ئوتتۇرىسىدىكى سەمىمىي مۇناسىۋەت سايىسىدا كۈنسېرى كۈچىيىۋاتقانلىقىنى ئېيتقان.
پىرېزىدېنت ئەلىيېۋنىڭ رەھبەرلىكىدە ئەزەربەيجاننىڭ مۇھىم بىر تەرەققىيات مۇساپىسىنى بېشىدىن كەچۈرۈۋاتقانلىقىنى تىلغا ئالغان گۈرلەك، دۆلەتنىڭ ئىقتىسادىي تەرەققىياتىغا، خەلقئارا سەھنىدىكى بارغانسېرى ئېشىۋاتقان ئابرويىغا ۋە قاراباغدا قولغا كەلتۈرۈلگەن تارىخىي غەلىبىسىنىڭ ناھايىتى زور ئەھمىيەتكە ئىگە ئىكەنلىكىنى تەكىتلىگەن.
«تۈركىيە بۇنىڭدىن كېيىنمۇ داۋاملىق ئەزەربەيجاننى قوللايدۇ»
گۈرلەك ئەزەربەيجاننىڭ رايوندىكى ئېنېرگىيە، قاتناش ۋە ئالاقە تۈرلىرى بىلەن زەنگېزۇر كارىدورىغا ئوخشىغان ئىستراتېگىيەلىك تەشەببۇسلارنى ئەمەلىيلەشتۈرۈشتە مۇھىم رول ئويناۋاتقانلىقىنى تەكىتلەپ، تۈركىيەنىڭ بۇنىڭدىن كېيىنمۇ ئەزەربەيجان بىلەن ھەمنەپەس بولىدىغانلىقىنى بىلدۈرگەن.
سۆھبەتتە، تۈركىيە بىلەن ئەزەربەيجان ئوتتۇرىسىدىكى قېرىنداشلىق ۋە ئىتتىپاقداشلىق مۇناسىۋەتلىرىنىڭ بارلىق ساھەلەردە مۇۋەپپەقىيەتلىك تەرەققىي قىلىۋاتقانلىقىنىڭ ئىنتايىن خۇشاللىنارلىق ئەھۋال ئىكەنلىكى ئەسكەرتىلگەن.
تەرەپلەر ئىككى دۆلەت ئەدلىيە مىنىستىرلىقلىرى ئوتتۇرىسىدىكى ئۈنۈملۈك ھەمكارلىقنى تېخىمۇ تەرەققىي قىلدۇرۇش يۆنىلىشىدە ئۆزئارا پىكىر ئالماشتۇرغان.
