جىبۇتى ساھىللىرىدا يۈز بەرگەن پاراخوت ھادىسىسىدە 139 كىشى ھاياتىدىن ئايرىلدى، 84 كىشى يوقاپ كەتتى. جىبۇتى دائىرىلىرىنىڭ ئىزدەش-قۇتقۇزۇش خىزمەتلىرىنى داۋاملاشتۇرۇۋاتقانلىقى بىلدۈرۈلدى.
ب د ت خەلقئارا كۆچمەنلەر تەشكىلاتى (IOM) تەرىپىدىن ئېلان قىلىنغان يازما باياناتتا، جىبۇتى دېڭىز تەۋەلىكىدە 305 كىشى ئولتۇرغان بىر پاراخوتنىڭ ئۆرۈلۈپ كەتكەنلىكى، ۋەقەدە 139 كىشىنىڭ ھاياتىدىن ئايرىلغانلىقى، 84 كىشىنىڭ بولسا يوقاپ كەتكەنلىكى ئۇقتۇرۇلدى.
خەلقئارا كۆچمەنلەر تەشكىلاتىنىڭ (IOM) كېيىنچە ئېلان قىلغان باياناتىدا، 305 كىشى ئولتۇرغان ۋە ئۆرۈلۈپ كەتكەن پاراخوتنىڭ 9-ئۆكتەبىر كېچىسى جىبۇتىدىن يەمەنگە قاراپ يولغا چىققانلىقى قەيت قىلىندى.
باياناتتا بايان قىلىنىشىچە، مەزكۇر ۋەقە ئافرىقا تۇمشۇقى دۆلەتلىرىدىن كەلگەن قانۇنسىز كۆچمەنلەرنىڭ ئەدەن قولتۇقى ياكى قىزىل دېڭىزنى كېسىپ ئۆتۈپ، يەمەن ئارقىلىق پارىس قولتۇقى دۆلەتلىرىگە بېرىشقا تىرىشىدىغان خەتەرلىك كۆچۈش يولى «شەرق يۆنىلىشى» دە يۈز بەرگەن ئەڭ ئېغىر ھاياتىدىن ئايرىلىش ۋەقەلىرىنىڭ بىرى بولۇپ ھېسابلىنىدىكەن.
باياناتتا پىكىرلىرىگە ئورۇن بېرىلگەن خەلقئارا كۆچمەنلەر تەشكىلاتىنىڭ باش مۇدىرى ئېمى پوپ: «ھېچكىم باشقا بىخەتەر يولنىڭ بارلىقىغا ئىشەنمىگۈچە بۇنداق پاراخوتقا ئولتۇرمايدۇ. بىز بۇ ئۆلۈملەرنى نورمال ئەھۋالدەك كۆرۈشنى داۋاملاشتۇرالمايمىز. بىخەتەر ۋە قانۇنىي يوللار جاننى ساقلاپ قالىدۇ» دېدى.
پوپ يەنە ھۆكۈمەتلەرنى ۋە مەبلەغ سالغۇچىلارنى پاراخوت چۆكۈپ كېتىشتىن بۇرۇن ھەرىكەتكە ئۆتۈشكە چاقىردى.
